友聚

我們真的好夠朋友，今晚才補祝 K 在 10 月 (！)、SL 伉儷  11 月及的我在 12 月的生日。選址旺角白布街的萬發食館。那裡打邊爐不便宜，但用料 OK 新鮮。雖是小餐館格局，但樓高兩層的萬發，坐落都幾舒服。

收到 SL 送的禮物。包裝紙用上 Sanrio 的肉桂犬，好小朋友哦！

明知我是 Kitty 迷，送我 Kitty 實用品實在太合我心意。我成世人最怕收到看得唔用得之物，例如公仔，我是億萬個抗拒的。自己心情不佳去買個公仔又是另一回事喎。其次最怕收到擺設，我家又沒有千幾呎，豆膶之地還要擺多個掛飾或是玻璃樽甚麼的﹖咪玩啦！

S 說這個小夾萬可以放姑婆本喎，我有嗎﹖不過我有大量豬二成戒子耳環頸鍊手鍊鐵鍊千其百怪的小物，放入去最好不過。而她更古惑地替我選了一個密碼是 30 的夾萬，真的好有心思。

K 送我一本結他譜，內裡大部份都是我喜歡聽的流行曲。我希望有朝一日可以很熟練地把它們都彈奏出來。對於這份輕薄的禮物，我收到的時候實在很驚喜。物雖輕，但感覺到朋友的情義很重。

再來，我要數 C 送我的那個花白袋。唉。

OK，這是一個我至今都難以理解及難以悉懷的一份禮物。當我拆開禮物紙看到這個花袋時，第一時間是沒有表情。我好記得自己是沒有表情。我對著朋友，喜怒很形於色，不喜歡就表現不喜歡。當然，沒表情即代表我不會太喜歡。在眾人面前，我狂鬧 C。

我：「咩黎架大佬﹖」
C：「一個袋啦好明顯！」
我：「咪住！我想問，你係咪買錯野俾我﹖唔係送俾我架嘛﹖」(我對他真的好直接。)
C：「送俾你架，我一見到個袋就諗起你喇！」
我：「唔係嘛！個袋點都唔襯我啦！」
C：「唔係喎，我覺得好襯你喎！」
我：「我 X！你睇下，條啡色繩同塊布都唔夾既！係咪夾硬車入去架﹖」
C：「妖，你唔鍾意條繩咪剪 Q 左佢囉！但條繩係俾你丁住丁住咁拎架嘛！」
我：「我點會咁樣拎個袋出街呀﹖你識我咁耐幾時見過我丁住個咁既袋出街呀﹖同埋個袋咁細，裝乜春呀﹖」
C：「呢個袋好好架，個 size 可以放你 d 姨媽巾呀，同埋 d 突然需要用既野，要去 7 仔買o個 d 呢，你可能第日有機會用架嘛！」
我：「白痴啦，o個 d 野使鬼我去買咩！都唔知裝乜，我鬼咁多袋啦！」
C：「咁你咪用你個袋再裝住呢個袋囉！哈哈哈！或者裝你部相機囉！」
我：「我部相機有個袋啦！型過你呢個花袋好多架！」
C：「咁你照用你個相機袋，然後用呢個花袋裝住你個相機袋，相機袋入面裝住你部機囉！」
我：「如果我要影相，咁係咪要開十 9 幾萬個袋呀老細﹖」
C：「係呀！哈哈哈哈！」

朋友呀，多謝你們。帶給我歡樂，帶給我痛苦 (！)。還有，我有好多袋仔，不要再送我袋仔。