阿宗麵線？

有朋友睇到飲食男女介紹，話荃灣開咗間阿宗麵線，老闆娘自稱喺台灣住過多年，想把台灣出名的小食同蚵仔麵線帶到香港，報道話好味…咁咪去試吓我至愛試新屎坑！

其實正確係叫「新阿宗麵線」至啱，但個招牌…雞嗱咁大隻字「阿宗麵線」，個「新」字，豆豉咁細，十足十啲賣衫舖頭「19蚊起」…個「起」字寫埋一二角又勁細博大家睇佢唔到。

坐位：係好大問題，坐喺隔離就係黑me媽後行的Bar枱位，感覺已經好唔好，加上張chair坐墊細，雲妮坐圍大，對腳吊吊fing，坐得好辛苦，有得揀坐喺開邊舒服得多，可惜出邊位少，好似得三張枱，只好局住坐入邊。

食物：偏鹹；炸物，粉多得滯；點了一杯蜂蜜珍珠，勁甜，飲唔落，要拎回家加水再飲(返屋企仲要唔小心倒瀉，得番小小又要抹餐死…xyz)

服務：落單的阿嬸黑口黑面，輸錢咁款。喺裡頭整嘢食的阿姐整好了，為了方便，唔行出嚟隔住個炸櫃聲都唔聲伸手遞啲嘢食俾我，我食食下嘢時無端端有嘢吊喺我面前，真係打咗個突！

不過，計價錢樣樣十多蚊咁，頗抵食。魯肉飯同蚵仔麵線都唔錯，下次會再去ge，但一定坐喺出面的露天座位，唔係…noway！

叫魯肉飯，嚟錯咗台灣糉，賺了一張相…

蚵仔麵線，好足料，蚵仔肥美同新鮮同好多，阿姐唔建議用筷子，會變水。台灣食法人哋都係用spoon！但冇記錯的話，麵線好似再幼啲…

炸雞塊。粉太多，脆脆超超超超多，肉還肉，脆脆還脆脆，唔掂…

魯肉飯，好食。

呢杯蜂蜜珍珠，足以令我患上糖尿病。仲有，珍珠玩「埋堆」…黐埋一大堆。

炸菇好味！

阿姐就係住呢個大櫃吊啲炸物同魯肉飯俾我！