搵屋

公司要搬去工業區,唔o係住宅,我唔再住公司,所以要自己搵地方搬。
搵屋好愁,因為要考慮好多野:
第一: 飛飛
第二: 租金
第三: 治安
第四: 返工近唔近

飛飛係我命根,我搵屋首要考慮佢,由於我老細突然又話唔俾帶飛飛返公司,所以我必需要搵個可以安置好佢o既地方。
首先,要搵個屋主係可以接受狗o既,呢樣就算係香港,應該都唔容易搵,加上聽我同事講,呢度o既屋主係可以隨時隨地,唔理你o係唔o係屋企,都可以自己用鎖匙開入去你間屋o既!
我同飛飛一齊住,就算屋主冇啦啦黎,有咩風吹草動飛飛都吠左,我唔驚!
我最驚係,雖然飛飛有辦狗證,但萬一個屋主衰,等我返左工,開門入屋叫城管(城市管理隊)捉左我飛飛,咁到時點算?
(之前去廈門論壇度講,有隻狗,養o係天台,剛剛生左6隻狗bb,然後隔離屋唔妥咁多狗,走後門定唔知點,叫城管黎提左d狗,城管居然o係冇通知狗主o既情況下,從佢隔離屋個天台爬過去狗主個天台,捉晒佢1大6小狗,雖然大狗有辦狗證,但最終小狗死左1隻,大狗都過左成20日先放返出黎)
雖然我o係呢度都識人做公安,都叫有個後台,但出左事先黎搵後台都遲啦,所以一定要保護至上!

而第二三四項,係相對o既,治安好,租金貴,租金貴,咁我就唔可以住得太遠,唔係就交通費貴。
住得近公司,返工近,唔駛交通貴,可以租好D o既屋,但弊左公司o係工業區,周圍住o既係工廠工人,好雜咁,如果住o係o個區,你問我.....我真係覺得可以用"淪落"黎形容。
住得遠,近中心,一黎租貴,可能要租細D o既屋,二黎交通又貴(坐公車唔貴,貴在坐的士,但坐的士比起香港o既地鐵,都唔算貴)

今日,去左睇一個地方,係單身公寓黎o既,即類似香港o既套房,成間屋冇間隔,有洗手間,陽台,屋中間放一張大床,大約三百尺左右,地段還可以,靠大馬路,門口有保安,但本身座大廈就麻麻,因為係單身公寓,有d人會買左,裝修好當酒店式公寓黎租,租90蚊一日,剛好我地睇o既單位對面就有兩個呢d公寓,如果佢地好生意,出出入入就雜d囉,而且我見門口塞左幾張人地派色情卡片啊,可能係因為有酒店式公寓,所以有人派卡片,睇下有冇人需要卦......有dd驚,不過可以加防盜,加上飛飛會保護我架嘛,所以應該唔怕o既~

屋內裝修好好,基本上我只要買廚具,搬衫褲同搬飛飛d野就可以入去住,而且好近方醫生,就o係後面,飛飛要打針,要買咩都好近!!!!
最最最重要係,屋主係識得o既,我絕對唔需要擔心飛飛會被人捉走!

陽台有用玻璃窗封好,如果如屋主所講陽台係向南o既,晒唔到太陽,咁我返工就可以放飛飛o係陽台,唔怕佢冇人o係屋企時佢會咬電線,食到唔應該食o既野等等等等,安全好多!而且陽台可以走動,玩玩具,可以放狗廁所,冇困籠咁慘!

租金應該普通,交通費可以接受,就算的士來回返放工,一個月只需500蚊。
如果ok,仲唔駛按金上期簽約,拎左鎖匙入去住就得。

半個月以來o既煩惱,看似輕鬆解決了~