以後未來是個謎，不必牽強說盟誓，難料那夜再一齊．．．

了一個星期之外，就是忙著學Dreamweaver、Firework，同埋Flash。希望快點可以完成阿姐個網頁啦，見到13兄咁有心思，又咁快手，真係有D慚愧。其實大致點做，都已經有個初稿，現今階段係學緊Flash，希望可以為個網頁帶點動感。

寫老大既歌，又點可以唔提佢既成名大碟『劉美君』。記得大概係小六升中一既暑假，第一次接觸到老大，就係係無記金曲挑戰站(廿幾年來仲有呢個節目)。果陣仲細，除左寫歌名去唱片舖叫老闆錄卡式帶之外，就係拎部卡式機放係電視面前，analog咁錄，我又唔多聽電台。邊有家下咁方便，download來聽下好唔好聽先買。記得當時錄到中途，介紹一位新人，隻歌叫『午夜情』。個MV一播就係舞廳既台，已經好驚。當聽到『誰願意身體每處任撫摸』，即刻熄機無再錄落去。嘩，當年我得11歲。撫摸呢家野真係聽到都會面紅。仲點敢聽落去。

到之後學校去旅行，當時好興帶卡式機去，係旅遊巴上面一齊唱。回程時其中播了一首勁好UN既歌，當時唔知叫乜名，總之係勁鍾意個編曲。一聽到你個欏柚係會不停咁UN，但又唔會好嘈。返到屋企見到電影播個MV。嘩，勁正！第二日膽粗粗咁去買了一生人第一個正版 -  卡式帶。日播夜播。但始終最鍾意，都係搞到個欏柚停唔到既『最後一夜』。

編曲正唔在講，歌詞真係好有意思。當時仲係僂儸既我，真係好想知『壞』係點既。呢隻歌自此大大話話陪左我廿幾年。錄卡式帶好，MD好，新歌中總會夾著呢隻歌。我電話第一個MP3鈴聲都係呢首歌，家下寫緊呢篇野都係聽住。我諗真係無乜邊首歌可以聽廿幾年都唔會厭，仲要無OUT既感覺。

呢隻碟係好多網站都被評為80年代十佳唱片。當年邊個屋企有唱盤會無呢隻碟? 銷量好不在話下，碟內好唔少歌係登上當時流行榜既冠軍位置。但可惜既係當年唔興頒金曲獎畀新人。就連新人獎都唔多。換著今日，真係拎獎都拎到手軟。苟姐志不在此，有無獎我諗佢都唔志在。試問之後有邊個新人可以破到佢銷量紀錄? 真係前無古人，後無來者。

除左『最後一夜』，我最鍾意既要算是『清晨』。可能你會覺得我懶感性，但係呢隻歌，我時不時都會聽到喊。『懷抱寂寞，手插在褲袋的我，沿著電車的冷冷軌道』。可能你未真真正正試過孤獨寂寞的感覺，但我真係試過得返幾幾度半夜三更係跑馬地一個人行電車軌。呢隻歌好能夠帶出果種『冷』既感覺。

『忘情』係黃霑寫畀阿姐既第一首歌。呢隻歌係中學用來教比喻真係FIT哂。『忘情，不可以可以不，不可再受傷；創痛，不可以不可再痛，不可再這樣』呢幾句歌詞，當年我仲未知有幾殺傷力。當到拍拖時，每次分手，都會同自己講過萬次以上。究竟填詞人係唔係真係要經歷過呢D痛，先可以寫得出這樣有共鳴的詞?

呢隻碟，傷心的歌仲有『假裝』。『從來傷心只好假裝作無奈的臉』我覺得比徐小鳳的無奈更無奈。『虧欠了他在等你』我做左都唔知有幾多次。唔通，呢D情情塔塔既野﹐早早就在聽老大的歌時，深深咁烙在腦中?

有返三十歲以上的朋友，無論係唔係老大的FANS，聽到呢隻碟既歌，點都會哼得返兩咀。未聽過呢隻碟都唔好話人知你係老大既FANS呀。可惜，我隻天龍版當年比人偷左個袋既時候無左。家下都係得返隻SACD。呢隻碟，實在太經典了。都唔駛我推介邊首歌啦。

推介歌：全碟

鳴謝︰13兄既圖