重陽拜山+燒烤

10月7日係重陽, 自從同左Jack一齊後, 已知道例牌節目就係去拜山!

果日我地九點幾就起身, 雖然我有d頭痛, 但今次係結婚後第一次去拜Jack的公公, 婆婆唔去好似唔多好, 所以我就食粒止痛藥就照去喇!

去到柴灣因為係正日關係唔比私家車上山, 只係準的士上!我地就將架車泊係停車場然後搭的的上去! 去到又係照以前一樣咁幫手接衣紙, 接完一輪衣紙跟住就上香喇! 拜完晒公公, 婆婆後佢地又提議去燒野食! 但每人對地點都有d意見!經一輪投票後, 就決定去好多人都好耐無去過既石澳喇! 不過今次非常特別, 平時會係各人揸番自己架車去既, 但今次Jack的二舅父居然叫我地坐佢架小巴去, 坐唔晒d人先揸車去! 最搞笑係Jack的表弟佢有小巴牌, 佢居然小巴引起, 話要由佢揸! 於是我地就好開心咁坐佢揸既小巴入去石澳喇! 因為我地覺得個feel好似小學生去旅行咁, 個個都好興奮!

好在二舅父咁提議, 我地入到去時見到d停車全部好full! 如果個個揸自己架車去搵位泊都勁頭痕啫! 同埋加上收費都幾貴! 我地泊係柴灣露天停車場, 泊左成日先$40咋! 但石澳要十幾蚊一個鐘!

個日天陰陰又有海風好舒服呀! 同埋果度地方大, 可以玩好多活動, 我地仲買左排球同風箏玩添! 個個都玩到好盡興同埋話下次要再黎呢度添!