2009年10月31日-1週年前夕

2009年10月31日
係上一年既今日係我準備結婚既大日子，因為11月1日係我人生一個轉捩點，而係今年既8月26日又係我人生一個重要既日子。
老公前一排問我有咩想要，我第一樣諗到既係電腦，但我今日係度諗，我要既野其實好簡單，只係想佢打少d機，比多d時間我同揚揚。
10月29日見姑娘，同姑娘傾左好多野，多數都係唔開心既野...
由10:30傾到12:00...仲要約去見多次係11月26日，以前曾經為左爸爸媽媽既事界手，曾經諗過自殺，姑娘問我而家有冇d咁既諗法，我好快咁答佢冇，因為我知道我有左揚揚，揚揚唔可以好似我咁成為單親家庭。所以對我黎講，老公如果要我開心其實好易。
講返今日真係令我好開心，朝早同左媽咪、揚揚同阿嫂媽咪飲茶，真係好耐冇飲過啦。
老公放工返屋企食飽之後第一時間唔係掛住電腦，而係同個仔玩，我個一刻真係好開心，佢仲要同個仔玩到格格聲咁笑。之後同老公去買揚揚既野返到屋企老公又幫手喂揚揚~之後仲同揚揚一齊訓覺，又係另一件我開心既事...我同老公講揚揚痾左臭臭，老公立即去整好d野，等我幫揚揚處理d臭臭，個心其實好甜，起碼唔洗我點佢做呢樣做個樣，佢識得自動自覺...到左我沖涼之前，見到老公拎住d公仔同揚揚講故仔...我已經知道老公已經送左一份好好既週年紀念禮物比我，希望我地一家都可以好似今日咁幸福，因為我真係好希望我帶比揚揚既係一個溫暖又開心既家庭，唔希望揚揚好似我咁...