上學期考試之疑問篇

尋日對住張考試時間表唸左成晚, 究竟咩叫中書 & 英書 ? 係考D乜 ? 點樣考 ? 普通話又分2日考, 1日oral, 咁另1日又考咩呢 ?

今日終於忍唔住, 打返學校, 搵班主任問下先.  哦 ! 原來係咁 :

中書 : 老師會叫小朋友打開其中一課課文, 係指定時間內抄寫.  係睇下佢地d字寫得端唔端正, 會以A, B, C ... 等級評分

英書 : 同上

普通話 : 第一天 - Oral (小朋友會讀一篇課文, 再跟小朋友以普通話對話)        第二天 - 筆試 (冇得溫既) (筆試係考小朋友既聆聽, 會有3部份 : 1st part -- 會讀單字, 小朋友要辨認係第幾聲;  2nd part -- 聽一段對話, 再回答問題;  3rd part -- 聆聽理解, 小朋友要聽一篇文章, 然後回答問題)

葉老師仲同我講, 呀仔講普通話既信心唔夠大, 往往就係口up up, 一係就講得好細聲, 要加以練習, 或者在家同佢講多d.  其他科佢就冇咩問題, 肯講, 肯答, 仲好雀躍.  就算面對外藉老師, 呀仔都可以好輕鬆, 好有自信咁同佢對話.

要佢對住本書黎讀, 我都仲可以咁樣同佢操, 但要我係日常生活都用普通話同佢講, 我就真係流汗啦  [棟]哂係度啦 ..... 可以點操佢呢方面既oral / listening呢  依家開始, 再播番d vcd佢聽  2個星期, 夠操嗎  又點樣可以練大佢個膽, 大大聲聲咁講佢想講既野呢

真係要唸唸