洗滌心靈

今日個頭好痛﹗轉天氣係咁樣。事緣生完仔個身入咗風，呢一世都咪駛諗好番﹗好多人敎我食驅風既食物。但.......重有其他身體問題所以唔可以食呢種食物﹗

既然我唔可以改變身體問題，咁我一定有能力去改變我心態。我好相信自己能力去到邊。

早十幾年我比身體問題搞到個人好唔開心，愈唔開心身體愈有問題。果時有睇佛經但無話跟法師去學。只係睇吓人生應該點做，唔開心時點面對。記得爸爸過身時對我來講真係好大打擊我小孩生活時間隨了妹妹對得最多就係父親。爸爸死果陣令我睇任何事都好負面

後來認識了一位竹林禪院的老法師(釋上修下福)，老法師知我果時做完手術無做野，都經常叫我去幇佢做事，個陣我唔鐘意做但又會去不樂意咁去完成這些事。後來先知道老法師同佢太太本來係西醫，最後一齊在禪宗的大德法座下剃渡。老法師臨終前敎我打坐，叫我照顧一位老比丘尼。但我都係無影無踪﹗後來老法師去完加拿大返香港回竹林禪院做完一塲盛大地藏法會，吩咐其他人不要入他的房間打擾他好多日後就有人發現老法師結了伽伕坐往生了﹗我知其實老法師對每個人都好好，身體有病痛的人他每日都會做一些中葯飯給那些人吃，不收分文。他很照顧有需要的老法師見我和獅子那時後生，怕我們給神棍呃﹗所以經常給我兩講學佛應有態度、目的。

我記得過咗幾個月認識了現在的上師時，我希望向他學習好等自己可以解決負面思想先。

但有個好出名既仁波切(同我師父係佛學院同學)的一些學生對我們說：你上師唔得架。你睇吓你地跟咗佢連工都揾唔到。我跟住同佢地講：而家係1998年經濟唔好，好多人都揾唔到工做，關呢d野咩事呢？你咪攞來一齊講啦﹗重有一樣野我跟上師唔係要佢比錢我駛，係佢敎我自己改變自己。跟住佢地有個女人就好串咁話：你無話貪你師父法座高。我跟住同佢講：我唔知咩係法座高，但我都見過好多法座高過我師父既法師，我都無諗過要跟喎﹗我唔跟你師父係因為我同佢無緣啫﹗

後來好多不同道塲既師兄講開呢幾個人，原來佢地好出名借佛門做騙子行為。成日話到自己師父有幾神通，向香港有幾大名氣。人地唔跟佢師父又話人壞話。連佢地同門師兄都睇唔過眼佢地影响咗個師父聲譽。

竹林禪院既老法師，就因為見佢地呃好多人而成日落去同佢地打交道，再敎識佢地身邊d人佛敎正確知識。又帶d人去正信道塲拜見法師。(好似聖一老和尚、寶林禪寺)

在老法師還未往生時我跟了這位藏傳佛敎上師。不知是否緣份問題，我在這位上師的言敎中學習得比較專心。我亦觀察了上師的行為是否一致。

有一次我在送機時見到上師同堪布在用自己的語言對話，後來見到上師個樣好怒。但好快上師就不停同堪布sorry....跟住聽到上師念咗好耐經重好快好快咁念，念完經又同堪布sorry﹗當時我先至意會到上師一直所講既：佢地始終係人，只不過佢地一出世有修行人敎佢地，而修行最主要係察覺自己起心動念。佢地都會做錯，所以敎佢地既上師係好惡既，一做錯事就會罰。上師既老師十六世大寶法王對佢地係從不放鬆，重成日試佢地既念頭。年少的上師有時會同其他仁波切開心玩到頌經唔正經，大寶法王就會叫佢地行過去。跟住......層出不窮咁令佢地唔敢再放肆。所以即使堪布無上師咁高法座，但上師唔會話做錯事而用法座去蝦人囉﹗仁波切重話見好多唔係佛門弟子，但佢地既行為敎養好好。反而見好多係佛敎徒既人真係言行嚇死人。叫我地要遠離呢種人唔好學佢地。

當時我係一個好唔同人講野既人，笑都唔笑。上師識我果時佢見我唔係咁既﹗需然佢無話我咁對人唔好。但上師有一次睇吓我又行咗去，跟住又番來睇吓我又行咗去。我咪望吓佢行去邊囉。跟住佢行咗幾步轉頭望吓我，就好快跑咗去。當時我見有架車駛去佢方向，係接入來湛山寺做火供法會的車。上師向對車門等車門開，續個落來既人佢用手付住等人落易d，跟住上師行開少少指住我叫我企過去。咁我企咗過去梗係落車既人我付住佢地會啱位d啦。跟住上師又走咗喎﹗我又走開無理d人啦。返到屋企。我梗係覺得...好似令老師失望咁。佢唔係咁知我點解會咁冷淡對人﹗我揾咗一日同佢講：仁波切，唔好意思。我都想對人好呀。但......有d人個腦唔知諗咩架？同你笑吓又話呢個女人成日同d出家人笑，都唔知醜架﹗獅子聽到有人指住我咁講走來話我。咁仁波切就話：你唔駛理人，而家你咁都有人話你架﹗我：''>-<''真係罪過罪過......

跟住同仁波切講：重有呀，我成日頭痛好辛苦呀﹗跟住仁波切話：你係唔係成日諗野架？唔好諗咁多啦。好辛苦就睇醫生吧。我：唔係呀﹗無諗野呀。仁波切：.......我又：......

其實我又真係成日諗野喎﹗成日掛住買咩餸、執屋、要快d收工陪猫。

又揾咗一日同仁波切請敎點解救？仁波切：.......我咪敎咗你囉﹗你無留心聽架咩﹗......我又：''>-<'' 明白明白......嘻<~~~~嘻皮笑臉

(仁波切真係每次一句起兩句止)

咁而家呢，拜訪咗好多道塲到學咗幾年觀呼吸同內觀點解會痛、點解會咁開心、點解會唔開心之後，請敎好多法師我坐禪出現既種種問題，都係得出一個答案你諗得太多啦﹗唔好諗咁多啦放鬆吓自己啦。其實我既頭痛問題好咗好多囉。但我表明一樣野唔係d神棍話咁有咩神通先呀。只係無葯食學用意志克服佢。以前真係一痛就要即刻訓覺，六年前重試過訓足兩日隨咗去洗手間同沖涼、餵猫就真係無離開過床。連野都無食到一d。果陣獅子重以為我奸妃死鬼咗架。