一個新超級英雄

蜘蛛俠3就快上喇,一見倒d咩俠咩俠咁,我又會諗起由細到大,都幻想過自己係其中一個,我最唔鍾意超人,又大隻又曉飛天,近乎無敵,但就係太強,變左冇乜刺激,好似亞蜘蛛俠咁吖,都算好打得,但唔算絕對無敵果種,好正.

我成日自己創造好多英雄出嚟,好似有一個就叫毛毛蟲俠咁,係一個比毛毛蟲咬親嘅女仔,讀緊高中,都好靚女下咁格喇平時,但因為生長於一個小康之家,所以冇乜錢錢買靚衫,咁啱佢讀果間又係d乜鬼死人名校,有一大班有錢仔女係道扮晒野果種,d有錢仔女對眼都好畸形咁生晒上額頭以上嘅地方,睇唔起d窮鬼同學,成日陰陰濕濕整古亞毛毛蟲俠,直到平安夜果日,毛毛蟲俠體內嘅毛毛蟲基因喺佢身體出現反應,令正為平安夜舞會冇靚衫著嘅毛毛蟲俠可以運用一種超能力,就係---由毛孔生出唔同色嘅毛毛,隨心所慾咁包住自己身體,就好似一件華麗到飛起嘅晚裝咁,毛毛蟲俠好開心,一支箭咁標左去舞會場地,當佢踏入會場果一刻,全場男女都比佢驚天地泣鬼神,啱細路又啱大人嘅驚艷鎮壓得鴉雀無聲,當晚想邀請毛毛蟲俠跳舞嘅公子哥兒排隊排到打晒蛇餅,但毛毛蟲俠一律冇理,最後佢邀請左佢果個自少青梅竹馬,一齊考倒獎學金嘅窮鬼同學亞家強跳佢第一隻舞,好鬼浪漫...!

果晚之後,毛毛蟲俠喺另一次無意中發現,佢果d特殊毛毛,唔單止防火防水防靜電,而且仲....已超出限定字數!!