農曆七月廿四日-忌理髮

真係吹到啤一聲

幾個月無剪過頭髮已經長到好似女鬼咁，不嬲對自己既事都係採取拖得就拖既政策，但真係太太太長嘞同太肉酸嘞，下個星期同學仔結婚又要去飲，所以今朝終於掟起心肝打電話去預約，想約２點但師傅話要３－４點先得，都ｏｋ啦！

二點半已經專程出到尖沙咀剪頭髮，基於未夠鐘既關係逛陣買咗要買既嘢先

三點半打比師傅話佢知我喺尖沙咀架嘞，你得就打比我啦！（因為好怕坐喺髮型屋呆等）

四點收到師傅打嚟既電話　↓↓↓

我：喂！得嗱？

條某利：um....不如你星期一先嚟吖

我：你唔係吖，我專登喺西貢出嚟尖沙咀剪頭髮架！同埋下星期約咗人無時間吖！

條某利：咁.....d客突然改咗唔焗油淨剪我時間失咗預算，我都無法架。你唔係要出嚟買嘢架咩 (仲想推卸)

我：買嘢係次要，我出嚟係為咗剪頭髮架

條某利：um..........咁........我仲有四個頭要剪，六點吖! 六點得架嘞! (佢講既六點即係起碼要七點，佢個鐘不嬲都係行得慢過正常人)

我：吓...............兩個鐘我去邊呀!同埋我約咗人七點食飯呀!

咁係咪而家即係邊個坐上嚟先，你就同邊個整先吖，咁係咪如果我兩點就坐喺度，你就要同我整先吖...........你知唔知咩叫 "預約"呀? 咁我約你做乜呀?

大家無奈 dead air 咗幾廿秒

我：六點先再算啦!

一心出去係諗住剪頭髮真係比呢條某利吹到我啤咗一聲，幾廿度喺條街度行到一身汗，仲要收到個咁既電話，我無爆粗炳佢真係睇在識咗十九幾年份上。

咪就去佐敦曾經幫襯過既一間睇下人哋得唔得閒囉

頂..................又full，至快要五點半先得

我真係無時間喺去飲之前可以剪到個頭架嘞........但個頭真係太肉酸嘞.........

是旦啦, 搵間似樣d架啦! 應該唔會剪到我好似怪物咁啩

就走咗去旺角睇下有無邊間個樣信得過架啦...

行咗九廿幾間，間間門口都寫住洗剪吹 $69，唉............平成咁真係唔敢入，終於結局就係食完飯打道回府。

唯有聽日近近地去將軍澳另一個frd介紹果間啦!

農曆七月廿四日 忌 理髮