基金整理

好快又過左兩個月，之前轉入既 貝萊德新興歐洲基金 同 JF日本基金 表現未如理想，分別下跌11.84%同 8.87%，決定換出，同時發現 景順健康護理基金 升穿五十天及一百天平均線，觀察了個多星期走勢似乎不錯，同時之前七月初轉入既另一隻 富蘭克林鄧普頓生物科技基金 升左 7.16%，相信熱錢正在轉向呢個行業，因此換入。

另一方面，早前保留既 施羅德台灣基金 呢兩個月都冇乜起色，與五月高位比較跌了20.79%，同買入價相比都跌左7.24%，故同時決定轉出，換入之前作牛刀小試既 生物科技基金，總持股量增至18%。

另外，兩隻礦業基金由高位回落，荷銀商品物料基金 同高位比較跌了16%，但仍比買入價高 4.82%，反而隻 貝萊德世界礦業基金 跌得比較勁，同高位比跌左25.8%，亦較買入價跌左6.18%，呢兩隻基金係我個組合入面都佔左幾大比重，遲下可能要轉一轉。

至於之前加入既三隻新基金，表現麻麻，但所佔比重唔大，加上自己始終對科技同電訊業幾睇好，因此並未轉走。反而唻緊新加既幾隻基建內需主題基金同外幣對沖基金似乎幾吸引，下個月再睇睇好唔好轉入去試下。

至 於長線組合，依然係BRIC(巴西、俄羅斯、印度同中國)，雖然新興市場呢一兩年都應該會有幾大波幅，中國又宏調，又後奧運效應，印度又通脹又加息，巴西 既商品價格又由高位回落，俄羅斯既石油同天然氣價格都下跌，不過由於係月供既長線組合，所以一於好少理，反正基金價格跌左同一筆錢仲會買多左單位，變相係 執平貨，套用返平均成本法，長線(20年以上)呢幾個市場節節向上，我要做既只係默默收集單位。

以上意見並不構成投資建議，投資涉及風險，基金價格可跌可升，本人乃證監會持牌代表，以上基金項目本人曾經或正在持有。