水汪汪烏代浦爾

人人話烏代浦爾Udaipur係印度人間天堂, 我親身去到, 十分認同, 但要多加兩個字「缺水」呀!

本來Lake Pichola人工湖建來是要解決當地旱災, 古時皇帝辛格又睇中湖光山色起了夏宮, 轉了幾手成為超級豪華的Taj Lake Palace酒店, 以前水頭足, 雪白皇宮加水中倒影 , 確實靚絕印度, 好可惜近幾年旱情告急, 湖水迅速人間蒸發, 快要乾塘了, 水位低到低無可再低, 當地人笑說可以步行過去.

幸好走到Seheliyon Ki Bari水宮殿依然水長流, 特別為歷代皇后妃子建造的水上樂園, 男人禁地也,  極有可能從人工湖抽水運作, 大大個花園內藏深水池, 仲有得噴水耍樂, 現在眼看也感覺涼浸浸呢!

全程令我最有皇宮feel的是走過對岸看City Palace的全相, 尤其黃昏, 真係迷死人, 蛋黃夕陽好溫柔咁照住皇宮又舊又發黃的牆身, 好有層次好有懷舊, 淺水動也不動反影宮殿倒影, 忽然被看sunset小船劃破, 假到似幅畫, 雖然湖水真係少得離譜, 但看到如斯動容靚景, 自嘆執到, 好難想像兩三年後會變成點?