十三個半月成長記錄

踏入十三個月後，旦旦的發展好似減慢，人地十二個月鬆少少的寶寶已經識行識走，佢仍然要扶住行，唔敢放手！雖然我知唔需要急，而且抱住佢的日子真係越嚟越少，我都唔想佢太快識走，不過做阿媽永遠都咁矛盾！不過旦旦給我的驚喜，永遠係估唔到！

踏入十三個月零三星期，佢呢個星期又突然神童上身，呢兩日响屋企經常唔扶嘢自己行，可以由廳行到入佢自己房，以前經過廁所門口要爬爬，而家已經可以行過去。今日仲開始成日不停行嚟行去，好想快啲教佢幫手攞拖鞋、掉垃圾！

除此之外，之前教識佢落梳化要掉轉身用腳落，偶然仲會忘記，現在已經駕輕就熟，仲越嚟越快，經常嚇親我！

現在經常模仿我地，包括：

幫我地：用紙巾抹咀、梳頭、插髮夾、探熱

幫佢自己：刷牙、戴口水肩、著襪、著鞋、聽電話、探熱、扣high chair的安全扣

(當然所有野都只係得個樣，係無一樣野做到的！)

另外，識做多咗好多嘢：

指住故事書講得出bird, dog, spider的der, duck, bear, fish, sheep, egg

識表達：指住水杯話water的ter，指住奶話med(佢講來講去都講唔到milk), 指住粥仔話mun.

搞笑對話：

1.How dad dad drink soup soup : shu shu

2.How fish fish eat mun mun : 變豬嘴，口郁郁！

3.Where is your big big tummy : 指住自己個大肚腩！

4.How sheep sheep shouting : 咩, 咩！

5.How 旦旦 crying : 呀, 呀！

識點蟲蟲，昨晚仲開始指入佢自己同我的鼻孔！

識得握握手、踢踢腳，但點頭就唔識，會全個膊頭一齊搖！

識指眼、耳、口、鼻，而家中文同英文都明白。

開始識得玩車仔，之前只會玩車輪，現在開始識推車仔同將車仔向後拉，等佢可以自己行！

配對圖形的玩具開始肯玩，但放頭兩個還可以，到第三個多數都走，大叫，要安撫或者捉住佢先可以玩晒！

食野方面：

食包包、粥的速度越嚟越快，上星期天氣凍食多好多嘢，今週明顯麵包上面！

鍾意食生果，蘋果、提子、木瓜、西瓜、橙、香蕉、蜜桃、車厘子、士多啤梨、藍莓。 連蘋果或提子加檸檬打汁都鍾意飲，仲同我爭飲！

中藥都飲過，但要溝奶，好彩都飲到！

西藥竟然肯飲，仲飲到咀舐舐，真係未見過！( 呢兩次開頭會掙扎，都唔知做咩，明明鍾意飲都要爭扎，飲咗一半先開始停止掙扎，跟住仲啜支針筒，吹漲！)

食物品種都唔係好多，仲係魚、豬肉、粥、字母粉同蔬菜，牛、雞都無比佢試過。麵包都係麥包、白方包、紙包蛋糕、豬仔包，試過生日蛋糕，山楂餅、提子乾、星星餅等零食。

衣服方面：

雖然多數買90比佢，但仍然係80最啱身。

性格方面：

雖然有時好百厭，會爬梳化、爬書架，又會踢波，但仍然好有女仔的性格，包括大叫，一做唔到或攞唔到就會大叫或喊！

鍾意teddy bear，會抱抱bear bear and kiss kiss bear bear！仲會逐個逐個錫錫！

都會嗲嗲，玩玩下會撲埋嚟攬住我地，有時仲會鼻貼鼻同我地咀咀，好冧！

細膽，去到陌生地方會變樹熊，唔跟陌生人，陌生人比糖佢都無情講，唔要，更加唔會食！反而唔理佢等佢自己熟習咗環境先，反而會好啲！