Production Date　：　31 Jan 2008

蛋蛋：

今日您已經有3個幾月大，去年今日你仍然係一粒蛋，係媽咪肚裡面。之前連續一個星期，媽咪都要去診所打針，因為醫生話媽咪啲蛋蛋唔係太成熟，就响果時開始，我跟醫生的叫法去稱呼你做蛋蛋！經過一星期的吹谷，醫生話媽咪肚裡面有3粒蛋，其中兩粒都成熟啦，於是响去年今日，好記得當日得攝氐8度，爸爸同媽媽响天寒地凍的日子，晨咁早去診所做第一次人工授精！

之前媽咪聽到人哋講未必一次會成功，响等待果14日裡面，媽咪都唔敢抱太大希望，只係諗如果可以一次就成功就係好彩，如果可以一箭雙雕就簡直係非常非常好彩！結果响08年2月14日，終於知道你完成任務，成功咁同爹爹啲蟲蟲結合咗，要變成一粒大蛋蛋！

由知道咗你响媽咪肚裡面開始，媽咪總覺得你會替媽咪帶來好運，首先係中咗一次六合彩安慰獎，雖然只係$20，但媽咪成世人都係中咗二、三次六合彩；跟住仲要連贏三次麻雀，而且係一家贏三家果隻！最重要係你响媽媽肚裡面時好乖乖，媽媽只係有少少頭暈，其餘的妊娠反應，好似作嘔、無胃口、抽筋等等問題都無發生，你知道媽媽幾咁多謝你嘛？

尋晚，媽咪有啲唔開心，但係你好似知道媽咪心情唔好咁，你竟然不停咁對住我笑，引我笑，以往都只有我引你笑，但你對住我笑的眼神，好似明白我唔開心，想我笑番咁！你知唔知後來媽咪係開心到喊！

蛋蛋，同你一齊的日子真係好開心，正如我由懷胎第一日開始經常對住你講，「你係一個好開心的人，你自己好開心，亦令身邊的人好開心！」我哋仲有好漫長的日子，我要帶比你歡樂，令你永遠都咁開心！