話咁快又11個月

上個月掛住搬屋, 原來已經成個月無幫旦旦update過, 明天9月4日又11個月大啦, 要數數她最近的新情況先!

因為搬屋而發掘番許多陳年的teddy bear, 洗過曬過後比旦旦揀選她的心儀朋友, 結果紅色格仔的音樂teddy bear係日間良伴, 小bear bear就偶然玩下, 最鍾意的是粉紅大頭bear, 陪住佢入睡.

仍然得兩隻下門牙, 上門牙準備出來,已經摸到一個小孔同硬硬地,  呢個星期成日忟忟憎憎, 相信係牙仔痕, 希望牙仔快啲出嚟, 唔使佢咁唔舒服.

自從上星期日阿媽餵兩餐粥, 旦旦都只係食咗幾啖, 再上個星期阿媽整薯蓉加三文魚肉和番茄, 你都係含住係口唔肯吞之後, 我決定以後姐姐放假都唔整粥仔比你食啦. 食包食生果加我地的大人食物算罷!

食物種類仍然好少, 豬肉加魚肉, 雞蛋黃, 粥仔加abc通心粉同薯蓉, 菜就多些, 菜芯, 菠菜, 番茄, 鮮淮山, 甘筍, 翠肉瓜, 節瓜, 冬瓜, 莧菜, 豆腐, 生果就係蘋果, 水蜜桃, 西瓜, 提子

敏感食物包括普通奶粉, 乳酪, 西蘭花, 牛油. 試過食蛋白, 1/4隻就無事, 但再試1/2隻好似出少許紅點, 要再試. 阿媽的食物敏感遺傳咗好多比阿囡, 睇怕阿囡都無得食雪糕.

每天維持玩樂同reading time,  經常唔知真定假, 睇書睇到入晒神, 揭完一頁睇完又返轉頭再睇過, 跟住又"啊"又自己笑, 唔知想講乜, 好得意. 暫時識講爹爹, 媽媽, 姐姐同duck duck, 但講得最多係爹爹.

識拍手, 識得一邊聽歌扭pat pat and shoulder, 識拍大髀玩排排坐. 成日用手指住人, 唔知係咪我成日鬧佢時都用手指指住佢, 所以佢會有呢個動作.

 終於識bye bye. 係阿媽強迫下開始肯自己拿水杯飲水. 偶然先肯自己拿奶樽飲奶. 但係試過要佢用手攞匙食佢最鍾意的水蜜桃, 竟然喊到死去活來一樣; 自己食餅都係唔肯, 只會攞住粒餅仔係手, 玩一輪都唔放入口, 由六個月到而家都係咁. 迫佢放入口又係會大喊.

開始認得fish fish, duck duck, bear bear, 鐘鐘同燈燈, 問佢會望住有關物件.

認人嚴重咗, 平時惡霸旦旦見到陌生人, 一係扮呆, 木無反應. 一係想喊, 要媽媽抱, 變咗隻樹熊. 需要約30分鐘時間warm up.

呢隻就係大頭teddy bear, 佢個好朋友. 一起身見到佢, 阿囡可以攬住佢錫錫同好安靜咁係床仔玩一段時間. 早上起床都仲要攞住佢.

而家阿囡的活動能力好似個男孩, 成日爬來爬去, 由地下爬上兩個箱上面, 跟住再爬上窗台, 有時由梳化爬上書架, 一點都不似女仔. 不過頭髮生長速度突然加快, 成日吉眼, 又唔想成日幫佢束髮, 佢又唔肯夾夾仔, 成日拔咗佢. 於是由阿媽操刀剪咗佢前面的頭髮, 比爹爹話佢變咗十兄弟(見下圖).

開始轉用花灑幫阿囡沖涼, 識得企係度扶住手柄, 洗頭佢會自己合埋眼, 但又好八卦想睇下野, 望住佢合下眼又開下眼個樣好好笑.

***************************

前兩天替阿囡交表報2010年的pre-nursery, 心儀是傳統的幼稚園, 但那天去的是一間活動教學的幼稚園, 心諗報定多間, 但那學校給我的印象是學生個個都好開心. 同埋在校務處外有許多動物公仔, 又有真實的金魚, 應該是給同學們上課用的, 感覺好像很好玩. 相信個個小朋友到這裏上學一定好開心. 但係又擔心升小學後, 又會追得好辛苦, 阿媽的茅盾心情又出現啦!