突破底線

姐姐終於都突破咗我條底線!

之前的家賊事件, 其實都一直令我好唔開心, 因為我唔可以再信任呢個人, 但又要扮無野!

跟住, 一直都無乜事情發生, 只知佢應承我話放假會跟家姐個工人去佢地自己租的地方gathering, 但一時話佢地要著回教的袍, 成百銀一件, 佢無錢,要等到還晒agent fee先可以跟家姐個工人. (呢個當然係藉口, 因為佢未還晒agent fee都可以買對puma波鞋, 又買兩個電話, 仲有佢而家好似有成5, 6對拖鞋).  跟住有次又話果日家姐個工人要幫手煮飯, 要好早出去, 所以果日又唔同佢去. 跟住佢同我講話明天假期會同家姐個工人一齊, 仲著住件袍出去. 過幾日我問開家姐, 家姐問佢個工人至知佢都係去咗銅鑼灣, 跟住電話都熄埋, 放咗佢飛機. 不過我都無再問佢, 我費時又聽佢解釋.

上星期六, 開信箱竟然發現一封佢的信, 我諗咗一陣, 都係睇咗. 因為我相信我問佢, 如果係借錢信, 佢一定會呃我, 咁不如我自己睇. 果然係佢借錢的信. 好嬲!

我已經同佢講過, 話佢financial management好差, 叫佢還晒agent fee之後要自己儲錢, 唔好成日買咁多野, 跟住佢話係, 所以同我講想開個本地銀行戶口, 等出糧後即刻入錢去銀行. 另外開多個印尼銀行戶口, 因之前用開的印尼銀行戶口係佢家姐個名, 佢家姐之前成日洗晒佢啲錢, 佢想部份錢比家用屋企, 本地銀行戶口留少少錢自己在香港使, 另一個印尼銀行戶口可以儲起啲錢, 等佢第時返印尼時有錢.

而果封借錢信就係佢用咗本地銀行個戶口嚟借錢, 可能用嚟做自動轉賑之類. 我果刻覺得佢好似處心積慮想方法借錢.

我果刻好堅決要炒咗佢, 因我相信佢係會繼續借錢, 同埋會越借越多, 所以即刻上咗Agent搵人, 而家等梗phone interview.

但當冷靜落嚟, 我又好矛盾! 睇見佢好有心機同阿囡玩, 亦識得教阿囡對與錯, 有朋友仔上嚟玩完, 自動自覺洗晒啲玩具. 又會自己教阿囡用potty. 佢湊小朋友的經驗真係好好, 我真係覺得好可惜, 亦有啲唔捨得.

仲要係佢煮餸又得, 清潔就一般啦, 但係完全唔使教, 自動波. 有點擔心新嚟的姐姐會唔會識得同阿囡玩, 會唔會咁有心機對阿囡, 同埋會唔會好蠢, 或者仲麻煩, 成日講電話, 又偷錢, 真係唔知. 仲諗到叫佢執包袱果日, 唔知會唔會見佢喊住口同我解釋一大輪, 一係話屋企有事要借錢, 一係話朋友叫佢幫佢借,   跟住我唔知會唔會心軟, 或者都忍唔住喊埋一份.

我仲諗果500蚊會唔會係我冤枉咗佢, 但係諗深一層, 如果阿sir同你講, 太太唔見咗錢, 我地可唔可以信你, 你答：yes, sure! 但係點解可以唔問一句係邊度唔見, 幾時唔見? 正常人係咪都會問? 家姐個工人都話, 如果佢覺得俾人屈, 應該都會同佢呻下, 但佢地之間講電話傾偈都完全無提過.

阿囡, 我都替你可惜, 呢個姐姐帶比你真係好多開心時光, 仲成日唱歌仔比你聽, 你扭計一過姐姐手你就靜晒, 仲有係姐姐餵奶你先飲多啲, 但係歡樂時光實在太短, 將來唔知會點. 新姐姐會唔會係你夜晚唔肯瞓時陪你玩? 定會打你, 虐待你, 阻住佢瞓覺. 你食粥仔時, 如果眼瞓, 你成日一邊食一邊喊, 姐姐識得引你, 分散你注意力, 新姐姐唔知會唔會. 我又要用十倍的精力同時間去接受新挑戰, 阿囡, 希望你好彩, 有個更好, 更忠誠的姐姐啦.