家賊難防

唉, 最近覺得自己好似雙面人, 個心好煩!

事關上兩個星期六朝早, 準備落街買野時, 發現銀包裏面有$500唔見咗, 因之前一日攞定錢諗住出糧比工人, 後尾因為去咗百佳買嘢, 打散咗其中一張$1,000, 所以銀包應該有$2,9xx, 點知, 點知我發現唔見咗張$500. 事關大嗱嗱$500, 用咗一定記得, 而且點會用得咁整齊, 所以我都好肯定係唔見咗!

可以係一晚裏面, 係屋企唔見錢, 咁仲有邊個吖, 估都估到係工人啦!

於是即刻使佢落街買嘢, 跟住同老公搜查佢個私人櫃桶, 結果當然無發現, 我諗佢都唔會蠢到放番係最容易被人發現的地方啩!

跟住佢返嚟後, 老公走佢問佢, 話太太銀包裏面有$500唔見咗, 你話我地可唔可以信你? 跟住佢用好堅定的眼神, 好肯定咁同老公講: Yes, sure!

雖然無證據, 但係我都認定咗係佢偷! 自從呢件事, 我真係耿耿於懷, 係咪應該炒咗佢?

其實佢嚟咗7個月, 呢7個月我係比佢80分, 佢無論係處理家頭細務, 煮飯煲湯或者照顧囡囡身上, 都令我好滿意. 唯一係佢係財務上的處理一直都令我好憂慮!

首先, 佢呢7個月要還agent fee, 每個月得$480, 有時加埋補假人工, 一個月都係得六, 七百蚊. 記得第一個月, 佢嚟的第二個禮拜, 我俾佢放假, 因果時都未生無嘢做, 咁就叫佢放假, 跟住我預支咗之前第一個星期日的人工比佢先, 不過都係得$120.  呢$120基本上佢要用兩, 三個禮拜, 但係佢都可以用嚟買拖鞋, 雖然只係$10, 但我心諗你無錢使都仲買野, 乜印尼人咁鍾意買野的嗎?

跟住, 第二個月出糧, 佢即刻問我佢可唔可以買電話, 我好奇怪咁問佢, 你得$480你點買電話, 但佢話佢有朋友的電話只係二, 三百蚊! 對於我嚟講, 我絕對唔會用超過一半人工去買一樣野, 我建議佢用住我部舊手機先, 到佢還晒agent fee先買啦.

但係未到第三個月, 佢已經買咗部電話. 佢可能賺我話電話舊電好快無電. 同埋係第三個月, 佢仲買咗對超靚的puma波鞋, 我諗要四, 五百蚊, 我真係好奇怪, 佢啲錢究竟係點樣使, 使極都有? 總之呢幾個月, 佢令我覺得佢有天生購物狂的基因, 而且係洗腳唔抺腳!

上個月仲發現佢有兩部電話,  而且每晚煲電話煲到凌晨成點鐘都未瞓. 我問佢, 佢有時話係個仔打俾佢, 有時又話係家姐個工人打嚟問佢英文, 我都好關心咁問佢, 你咁樣賺埋啲錢咪攞晒嚟交電話費? 我話如果係家姐個工人打嚟問你英文, 你用屋企電話啦!

但係自從果件事發生咗, 我表面上雖然無乜野, 但係個心真係下下好提防呢個人, 成人都諗個手袋有無放番入房? 要將所有現金放番入有鎖的櫃, 仲要袋穩條鎖匙. 頭先去沖涼, 老公又未返, 突然諗佢會唔會襯我沖涼, 偷入我房偷我銀包啲錢. 跟住要特登數清楚銀包啲錢, 仲要寫張紙貼响銀包面. 然後又要將鎖匙放係隱蔽啲的地方!

唉!對住個咁唔可以信的人, 但係炒佢我又唔知自己搞唔搞得掂. 同埋請過個可能都係咁, 而家都諗梗係咪應該自己小心啲就算? 但係下下要防住, 度住, 真係令人好心煩!究竟應唔應該炒咗佢呢?