2個月大啦

放完產假返工已經一個星期了, 一個字形容 "忙"!! 早上一開工就忙到頭昏腦脹, 轉眼就放工, 本想完成手頭剩餘既工作, 但更想回家倍家朗仔, 因為一整日冇見過佢, 十分掛念。   

由於我要穿著制服既關係, 當第一日返工時, 帶著戰戰兢兢的心情到廁所換衫, 好彩仲著得落, 不過超超超"緊" 囉 , 大d動作都驚迫爆, d同事問我入面係唔係著左 muscel tee, 手臂同背部咁多肉! 我而家做嘢唔可以舉高手, 因為根本窄到舉唔到, 條裙拉鏈要好小心咁拉, 因為驚拉爆, 哎! 好慘呀.......... 

唔經唔覺家朗仔已經2個月大啦, 時間過得真快!!

2個月前, 佢只會食同瞓, 但係而家會眼仔碌碌咁手舞足動, 會同您講BB話、

以前每一餐都要掃幾次風, 仲係掃到手軟都掃唔到, 而家飲完奶, 只要將佢個身坐直, 佢就會自己"喔"d氣出黎、

以前每晚要起身喂奶, 而家夜晚11點食完可以到第2日8點再食, 即使半夜醒左, 只要拍幾吓就會繼續瞓番, 頂多幫佢換片、

以前食飽就瞓, 瞓飽就食, 而家瞓醒就要人同佢玩, 如果冇人理佢, 就會忟憎咁大聲"呀!呀!", 等您注意佢、

以前會乖乖咁食奶, 而家明明肚餓又要扭計,  有時就食食吓奶會咬住奶咀玩, 要三催四請先肯飲埋d奶、

以前聽到聲音冇反應, 而家聽到聲就會八掛咁睇吓邊到發出、

以前去街只會瞓, 而家會好奇地左望右望, 覺得好新鮮, 好得意, 即使眼瞓都唔瞓住、

以前唔使點抱, 而家唔鍾意人抱, 因為阻住佢手郁腳郁、

以前同佢影相會唔理您, 而家會定定咁望住個鏡頭, 等您同佢影、

以前從佢眼裡可以見到自己影子, 而家通常會見到電視機既影子....