見鬼勿O嘴，潛水怕屈機.....

By RMB:::

講起「見鬼勿Ｏ咀，潛水怕屈機」
除左華天龍號撈番架烏克蘭船之外，真係好難得可以用番呢句野
既唔工整唔押韻
潮語還潮語，都要岩文法、都要常用、都要有意思先得架
唔係因為你自己覺得無文化就可以亂用
邊個出卷架...咩出卷態度呀，做壞哂榜樣
作為我一生中既大敵
考評局平時好不屑咁用隻尾指都搞掂我地
依家搞咁多野最後仲要玩番自己轉頭
連我都覺得羞家

正解（有錯請插）：
「屈機」：因遊戲程式的錯誤利用漏洞得勝，衍生為在爭鬥中利用外在優勢產生不公平情況
用「屈機」個陣永遠都係有Ｄ不忿
如：「你屈哂機啦！」
唔會「你咁屈機，我甘拜下風」
根本精神上都無屈服過
如果係「玩遊戲者因無法取勝而屈服」
咁香城既人普遍都係精神分裂啦

「喪喊」：呢個都勉強啦
點解唔用喪笑？喪除左「極其」、「誇張」外，仲有「不斷」、「胡亂」既意思
笑都勉強你都可以叫笑幾下，但點樣量化「哭」呢個動作？「哭幾遍」就已經同「痛哭」唔同意思啦
同埋喪喊我覺得係「不斷誇張胡亂的叫喊」多於「痛哭」咯

如果無「不斷」既意思
常用既「喪蒲」又點解？
我將考評局既「喪」同「蒲」一齊用
「喪蒲」（考評局）＝極其地浮／誇張地浮／極其地遊蕩／誇張地遊蕩
咁「誇張地浮」係唔係＝「浮誇」呢？
「喪蒲」＝「浮誇」？？
亦都可唔可以搵人示範下「誇張地遊蕩」？
大字型遊蕩？遊蕩速度 16x？
咁「遊蕩」係唔係解做「遊公園蕩韆鞦」？.....

「他的言論很激」：
激＝極端、激進
明明第一個解岩
係都要話係刺激
我覺得「激」字形容詞同動詞有兩個意思個陣
人就唔會亂用
唔好以為潮語可以亂黎
Get 唔到就如廢 up
唔順口就唔順口
潮語既廣泛使用
係因為大家一聽就明嘛

算啦
呢Ｄ潮語都唔可以話有共識
不過亂用絕對唔會有好下場

有Ｄ字係現代先有呢Ｄ狀況唔係夾硬去頂另一個字
如果純粹替代一個字，無咩市場可言（除非粗口）
好似「Hea」咁，我搵唔到有咩中文詞替代
感覺只能意會不能言傳
都係 Gag 佬既正解最深得我心：
「一個人 Hea 個陣係唔知道自己 hea 緊」
真．Hea 既境界係應該無目標、漫無目的。
（但認真的，Gag 佬岩既話我自己都成日用錯）

個人覺得啦
潮語亦都有佢既價值既
只不過好似簡體字非官方版
他日有人覺得方便既，要改都無得阻止
而且古時無潮語既話，我地都唔駛背到傻兮兮
雖然都唔想搞到中文咁低水平...= =

同埋佢個Ｄ潮語
只可以講太「潮」了
「屈機」Ｆ２個陣已經用緊
「激」更加無潮過
（城城首最激帝國我無記錯已經係十二年前咯，都上個世紀既事啦）

但如果佢搞咁耐都唔知「潮」字點解既
咁又好難怪佢既......
買潮語卡番屋企好好練習一兩年先啦！

搭單問，香城大學語文學士（榮譽） 招唔招生？
我想屈機呀～

[[我睇完都覺得好笑...

唔知幾十年後我d 子女問番我點解....

我會唔會唔記得左?!但肯定果真時都笑到碌曬地....]]