網誌分類：點滴 |
Week 32 (6-12/8) - 2
星期六, 全日 d 雨都無停過, 討厭 
Mission Impossible 可以算係 accomplished, 不過我準備將 target extend 多 20% 
"巴塞" 場波延至今日 2:30pm 開波, 我瞓醒、食 d 野、hea 一陣已經要出門口. 因為要見亨利 BB, 所以裝身裝耐左, 趕頭趕命 2pm 到 cwb; 又因為封哂路, 所以由地鐵站行去大球場都行左半粒鐘, 成身雨水汗水係咁滴, 化左靚靚妝都無用 
d 飛係 "蕉仔" 幫手撲嘅, 原本有靚位, 但只得一張, 所以細佬為左同我一齊睇就屈就左去山頂位啦. 唔好話, 山頂位都要 $380, 真係搶錢 
熟我嘅人都知我去係為左見下亨利嘅真身啫, 結果都唔係好睇到, 唯一令我喺球場上跟到佢嘅就係佢個 skinhead 
坐咁高, 好多時都要靠個大電視去 close up 睇清楚發生緊咩事, 但今次個 camera man 廢到爆, 球場有人受傷, 你唔 close up 映下佢咩狀況都重播番佢點整親丫, 點知佢就係咁映住 d 觀眾, 都忽忽地嘅 
成場波, 講真, 幾悶, 呢 $380 洗得唔抵. "巴塞" 點只當練波呀, 簡直慢慢黎扭下花表演俾你睇, 仲可以控定個波先慢慢射都射得入 
香港又係嘅, 搵番 "南華" 黎踢都好 d 丫, 無啦啦整隊 "傑志" + "愉園" 聯隊, 平時又無夾開又唔係一齊操, 默契全無, 全程俾 "巴塞" 帶住黎跑啦陰公 
4:0 都算俾面啦, 睇得出 "巴塞" 好似玩玩下咁, 輪流一人一粒, 亨利直頭行行企企唔追波, 等個波埋黎先開始郁下, 仲要佢嘅入球係用頭頂入嘅, 不嬲睇開亨利嘅都知佢好少用頭鎚架嘛, 玩哂野 
論速度, "巴塞" 真係快三拍有多, 港隊兩、三個人 mark 人地一個都可以俾人地走得甩嘅; 論技術, 就更加係大學生 vs 幼稚園 
上半場出哂 d 猛將兄, 下半場俾班猛將兄玩多陣就換 d 新仔出黎操下. 大家嘅注意力都落喺 "山度士" 度, 話哂佢新得黎又勁, 場場踢波場場入, 又得嗰 18 歲仔前途無限, close up 見到佢個樣真係好小朋友下, 但我覺得佢有 d "細哨" 嘅影子, 可能因為佢地都黑黑地又唔靚仔啦 
睇埋最後頒獎, "巴塞" 都係得隊長 "細哨" 同領隊 "列卡特" 去領獎, 其他球員完全唔 care, 返哂入去沖涼換衫 
香港除左隊波水皮, 個大球場又係幾失禮嘅, 踢兩踢 d 草就撬起哂, 落雨個場又唔去水, 跣到一個二個攤攤腰, 真羞家 
來回大球場都人頭湧湧, d 人又擔哂遮係咁篤我個頭, 搞到我好忟憎 
完場細佬約左 "蕉仔", 我就約左一樣有去睇波但坐唔同位嘅 "老 Day" 同佢個妹 "YL" 去 cwb 做正經事: 揀伴娘裙 
行哂成個金百利, 只睇中一間, 但隻色係紫灰而唔係同新娘子 "良豬氏" confirm 左嘅香檳金色, 而且要 $1,300, 又話度身訂造可能要兩個月先起到貨... 既然又 overbudget 又唔知趕唔趕得切, 都係黎緊呢個星期搵晚放工再去金都睇多次, 可能隔左半年 d 款唔同左呢? 
雖然做唔到正經野, 但都係脫離唔到破財嘅宿命 
死人 "老 Day" 囉, 入到有間 shop, 拿著一件掛頸背心係咁話襯我, 結果我買左橙色 tone, "老 Day" 就買左同款藍色 tone. 算啦, $245, 又真係幾靚... 再黎就俾我睇中條紅撞黑吊帶束腰及膝裙, 好 elegant、出得下場面架, 八折左 $480, ok 啦! 諗住 "良豬氏" 大日子嗰日我唔洗全日都著住條伴娘裙, 夜晚可以換呢條裙出場嘛 
可能 "媚美" 出閣嗰晚我都可以著番呢條裙去飲添, 如果到時仲啱著的話... 唔得, 一定要努力 keep 住而家嘅身形, 加油 
行完金百利已經成個人散哂, 行左兩粒鐘之嘛, 唔通真係人老體衰得咁快?! 不過可能之前睇波都辛苦左一輪啦. 同 "老 Day" 兩姊妹分道揚鑣後又係各自返歸嘞. 今晚英超開鑼, 我去沖個涼之嘛 Newcastle 就入左兩粒嘞 
一路都開住個英超台, 但都無認真睇, 只見到而家 "利記" 贏緊 "維拉" 一粒. 超攰, 連今日嘅報紙都無精神睇啦, 都係上床聽鬼故瞓覺, 養精蓄銳準備聽日嘅家居清潔同公事 
