咒怨...

原來呢個世界有種魔咒叫:

《就算老闆無返工我都無得準時放工》

上星期二係咁, 今日又係咁... 

今日適逢高經 "super mario" 上左京、老細 "阿爹" 又攞左假陪個細女小六放榜, 以為掂啦, 無人搞住我, 清咁 d 野就可以 5:45pm 即閃去做 "占"; 所以尋晚已經預備好哂今日嘅糧草、裝束, 著哂波鞋上路返工去也.

食左條蕉做早餐, lunch 時未肚餓, 擺番盒 packed lunch 入雪櫃留番聽日先食; 2:30pm 食左隻蛋, 3:30pm 食多條蕉, 4:30pm 再食多隻蛋, 預備有 energy 去做 "占" 啦.  一帆風順到 5pm, 突然收到消息: 我地公司嘅海外 partner 竟然同我地嘅對手開左 "生滋" 同 "揩士必" 而我地仲未開到 

頂佢丫, 我都知另外嗰兩隻曲街同事 "波" 同 "阿路" 唔會點理架啦, 我咪自己 check 番哂 d history, 睇番點解我地搞咁耐都未搞完, 仲要俾人捷足先登囉.  結果俾我發現 partner 同 "阿路" 講過話佢地 lack of resources!  當堂嬲到我爆, 寫封依貓去摌佢、兼兇佢要佢兩星期內同我地開到囉  喂, 你同自己友就 lack of resources, 原來 d resources 去左我地嘅商業對手度呀?  無病呀?  呢單野好快會上到 top management 度, 佢地都會向集團反映, 咁 "波" 同 "阿路" 咪覺得無乜野囉.  不過我同佢地講: 到頭來 top management 係咪會怪番我地點解無跟進得緊 d 呀?  點解唔奪命追魂 call 到 partner 做野呀?  最終咪又係我地唔著囉!  因為講中哂, 所以佢地兩個即時無聲出

好心佢地做野就上心 d 啦, 返工係就係為左份糧, 但你都要對得住人對得住自己先得架, 唔係咩都得過且過就算架嘛!  唔係公司出糧俾你托呀?  連 TT 都有同我反映過, 話 "波" 同 "阿路" 做野係踢一踢先郁半郁, 有時 d partners 唔郁佢地就唔再理, 只係怪哂人地話人地唔肯做咋唔關佢地事, 咁就唔洗再跟落去嘞.  大佬呀, 我都係咁做野嘅啫, 仲要多佢地幾廿倍 workload 啦, 又唔見我有野落後於人要 "阿爹" 去補鑊?  人地 reject 你, 你落多幾分咀頭氹下人/兇下人/傾下條件, 追多兩追人地就做架啦!

"阿爹" 又係, 太好人啦, 俾自己嘅下屬蝦番轉頭都有嘅.  阿頭話要做嘅, 幾時輪到 d 細嘅唔 agree 呀?  仲要有鑊時喺大老闆 "丙羊" 面前幫佢地兜、幫佢地講好說話  比著佢地 under 我?  死左好耐啦...  做野無效率、無心裝載講幾廿次都唔記住、叫佢地做野又拖拖拖、拖到尾仲要唔跟指示去做、無 d initiatives 要人叫到先做、下下都賴人地點點點、仲要呻辛苦、無乜野做都卸 d workload 落 "媚美" 度...  家陣公司出糧俾你地日日返黎 hea 呀?

唔得, 做 facial 時我一定要 "阿爹" 正視呢 d 問題, 如果唔係佢連我都無埋就知死

好啦, 知道呢單野實會俾上頭話架啦, 我就 sms "阿爹" brief 左佢先啦.  佢打番俾我, 我話哂俾佢知我點幫佢處理左之餘, 原來佢話 "丙羊" 仲有其他野想問, 叫我幫佢搵 info 直接俾 "丙羊".

搵囉, 都已經過左 6pm 啦  依貓左 d 野俾 "丙羊" 之後我再 follow 多個電話問佢係咪要呢 d, 佢就再問多 d 野, 搞到我又要再整理 d info 俾佢.  好彩平時我跟得足, d 料一早已經喺度, 係要解釋得詳細 d 俾 "丙羊" 知 d 料要點睇啫.  唉... 俾完一樣佢又問第二樣  話哂俾大老闆嘅料, 梗要詳盡 d 同整得好睇 d, 仲要 double check 唔好有錯漏, 同埋夾多 d info 俾佢等佢有個齊全 d 嘅 overview 啦. 

不過今日都有少少開心野嘅, 就係 "丙羊" 竟然自己依貓我問我對某件事嘅睇法, 而唔係問 "阿爹" 喎  我都好 pro 咁答左佢.  希望佢真係開始留意到我嘅表現同能力、知我仆心仆命為公司做野、兼 out-performed 哂另外嗰兩隻曲街啦

服侍完 "丙羊" 已經 7pm 過後, 成條 team 得番我一個咋  攰到死, 都無心機兼無力去做 "占" loo  惟有留低袋 "占" 野喺公司, 用個 lunch bag 裝住 d 銀包、鎖匙、八達通等等就返歸啦.

返到黎又係攰到無胃口食野, 但而家沖完個涼又覺得有 d 餓啦喎  放心啦, 唔食架啦, 早 d 去瞓就唔覺餓架啦  聽朝又煮兩隻蛋拎番公司先; 希望聽晚可以成功地 6pm 左右放工去做 "占" 啦