Bangkok 4日做豬的生活 之 Day 1

因為結婚的關係，舊年完全無去過旅行，所以一早決定婚後，要飛去Bangkok輕鬆下~

我呢d身痕人，就最岩"自由痕"架啦，係Priceline選左4日3夜的package～　

去左Bangkok呢4日，日日做隻豬，食完就訓，訓醒又食，食訓食訓，想唔肥好都難啦～

自從對上一次去bkk 搭過OX之後，我發誓，寧願唔去打死都唔會坐OX，今次選搭番一向搭開的泰航，仲要係早機去晚機返，嘩～　玩到足呀～

好啦~ 就睇下今次的"油雞"係點啦~

　Date : 26 April 2008 (Sat)  晴天

8:00am機，羅你命呀，晨咁早就要起身，打的去機場啦，唔好諗～　去到機場，除左人之外，週圍都靜英英，去counter check-in，幣....... 好FULL呀.....要分開坐添....點解會咁架........

今次終於記得ORDER素食的飛機餐啦，我唔太鐘意食個d趕爭爭的肉類，而且食清淡d，到去BKK先同佢死過~ 哈哈哈~

呢個就係我的素食飛機餐，去呢程我選左中式，估唔到好似去酒樓飲茶咁，有點心食，坐係我隔離個中年男仕，應該係飲慣茶的人，佢一見到我咁早有得食巳經奇怪，到派餐時，同空姐話要我個d，Sorry，我一早order架，你緊係無啦～　 味道都好ok，清清地岩我食呵~

去到機場，拿拿臨走去搭taxi，一見個司機樣就知佢好老實，唔使我地提佢，自動自覺行meter～　半個鐘就到酒店啦，Check-in時 upgarde左我地間房~

走去搭lift，點解襟唔到既，睇清楚d，原來要用插key先可以襟到架，咁即係話只有住客先可以上到房，保安又唔錯喎～　開門個一刻，好有一種家的感覺，間房大到呀..........

  

仲要係睡房同客廳分開，有煮食，我地計過，面積都有500-600呎，超舒服呀～

hea左一輪，即刻走去chilom食飯，順便換錢，原本想去搵水門雞飯食，點知唔記得帶張地圖，唯有係Big C附近食，選左間街邊檔食雞飯，除左d雞麻麻地外，d飯同汁都好好味，唔介意坐街邊食的朋友可以一試，有飯有湯分量唔算多，只係25THB，HK$6都唔使，仲想點～　

唱完錢，行去BIG C樓上的FOOD COURT，又見到有雞飯，買左一碟2份食，味道.....都係街邊個d好食d，如果食唔到街邊野的朋友就去呢到食啦，話晒有冷氣嘛～　

  約左4:00PM做MASSAGE，要走人啦～今次選左Uurban Restore，做左Oil Massage + Herbal Ball，選呢間係因為想試草球，而佢地仲係雙草球做添，再加上有10% discount，shop唔係好大，週圍都好寧靜，雖然只係做2樣野，佢地都比左間couple Room我地，最重要，佢地手摯好好，好到位同好舒服呀，訓左2hrs，走番去Big C的supermarket出下血先~

 係Big C見到D彩色米，嘩～　食唔食得架～

平日都巳經好鐘意行supermarket的我，去到Big C，係咁買野，主力係買麵同米粉，水公見我咁買法，就講左句"你不如成箱買番去啦"，你咪以為我講笑，一聽完佢咁講，即刻走去立一箱，哈哈哈，問你死未，講得咁口响啦～

2/3的野都係Big C買架~

買到成日都係，費事週圍搵野食，直接走去Central World食日本燒烤，呢間叫"赤"的日本店，之前係blog到見過有人食完好評如潮，再加上仲要係用真炭黎燒添

等食等到2個儍左........

 

 你睇下，真係用炭黎燒架～　yummy~

唔好講野啦，快Ｄ開餐，好餓呀～

　

　唔該黎多個炸蝦天婦羅呀，好好味呀～

 

食飽飽，總括，最好食係牛肉，好好味，燒的蝦比較失色，因為加太多醬汁，唔岩我食，反而個炸蝦天婦羅好鬼正～

走出門口見到有Swensens，嘩～　我至愛呀～　每次去bkk都係必食的雪糕火鍋，我地只係叫左個細的140THB到，好好味～　

水公等食個樣呀～

今日因為一早機，所以超級眼訓，食飽仲想訓，10點就返HOTEL訓攪啦~

明天請早，繼續做的第2天.............