陳太靚湯

啱啱過咗嘅重陽節假期, 原本嘅陳生小學同學 BBQ 聚會取消, (係呀, 真係好厲害呀, 聽講有幾個仲要從來無試過同班!!!) 陳生難得休息, 陳太梗要煲個靚湯煮返兩味啦! ( 「糧期」就到嘛!! (奸笑)) 

假期前陳太同細佬妹燒完嘢食, 又同亞毛食咗豬潤牛肉麵 ....... 真係要食返啲高纖食物至得。所以, 果晚煲咗木瓜花生雞腳湯, (木瓜除咗高纖之外, 仲可以豐 "zone" o架, wakakakakaka~~~~) 整咗番茄洋蔥炒蛋 (陳生至愛), 同埋炒椰菜 (陳太至愛)!

星期二, 陳太見開始有啲秋涼, 天氣又乾燥, 咪煲個椰子雪耳烏雞湯潤下囉!   (屋企樓下街市有椰子賣, 包埋開。) 餸就簡簡單單, 炒娃娃菜, (娃娃菜同椰菜都屬易洗系列, 哈!) 加個蟹柳蒸水蛋。今次蒸水蛋明顯有進步, 之前睇書話蒸水蛋要用耐熱保鮮紙包住, 保鮮紙.........chemical 嚟嗰喎........ 有保留, 有保留! 老爺話加兩滴白醋, 蒸時唔好冚實鑊蓋; 又試過用中小火蒸, 蒸一陣熄火焗....... 都係唔夠滑! 請教老媽, 老媽話:「搵個碟冚住, 凍水落鑊吖嘛!」所以話, 真係唔好睇小啲師奶!  師奶智慧, 唔係人人都有機會領略兼實踐o架!

點解無相睇? 唔........陳太屋企有個唔等得、唔餓得嘅老爺嘛! 要佢等我鋪靚張枱, 映埋沙龍至開飯....... .........找屎咩?!