三日兩夜法國(醫院)之旅

11月11日 (星期三)

本來約咗星期一同細佬仔入院, 不過婆婆同嫲嫲都話不如等遲多幾日細佬d咳好d先, 結果都係改咗星期三先入院

約咗8:00am入院, 晨早就要出門口, 仲早過返工

上到病房呢隻馬騮都不知幾好奇, 不停咁喺張床床度行嚟行去

週圍檢查吓先 ~

唔知點解入咗院之後細佬d傷風咳都好返好多喎 !

仲好開心添 !

佢真係好鬼曳呀 ! 居然夠膽死雙手"mun"住近窗簾嗰邊高d嘅床欄, 然後雙腳一齊凌空吊起, 好似做引體上升咁, 跟住仲用佢雙豬腳箝住張床d鋁"通"好似想爬出嚟咁呀 ! 搞到我連入toilet都要九秒九衝返出嚟呀 !

仲有就係醫生入嚟巡房嗰時佢居然伸手叫醫生抱抱同搞醫生d嘢囉 ! 連醫生都笑佢係馬騮仔呀 !

朝早10點幾照完ultra-sound要到黃昏先有report, 7點幾兒科醫生嚟巡房同我哋解釋份報告, 見到原來細佬兩邊都有小腸氣問題, 不過左邊只係好輕微, 右邊比較嚴重. 都係嗰句啦, 要醫就一定要做手術, 唔會自己好返, 唔做有可能越嚟越嚴重, 佢可能會痛啦, 同埋嚴重d嘅話可能會壓到d腸壞死.

我哋都係決定要做手術, 兒科醫生要幫我哋再call外科醫生嚟再睇, 不過姑娘話個外科醫生做緊個大手術, 要10:00pm後先可以嚟到, 無辦法之下又繼續等, 點知一等就等到11:30pm...

呢個外科醫生都幾好人, 同我哋好詳細咁解釋個手術會點做(雖然有d我哋都唔係好明), 有咩風險, 手術後有咩要注意同收費等, 跟住即刻幫我哋book手術室. 不過因為第二日嘅手術室好full, 所以只可以book到8:00pm. 雖然我哋想朝早做, 唔駛細佬捱餓, 不過無計啦 ! 好彩醫生話只需手術前四小時禁食啫, 咁都唔係好耐 !

11月12日 (星期四)

因為今晚8:00pm先做手術, 基本上今日都係無聊地等

無嘢好做大家一齊瞓吓覺

張床係咪好大張呢 ?

臨落手術室前, 細佬開始眼瞓, 喺度發呆, 仲差d瞓著添呀 ! 姑娘由豆爸手上抱走佢嗰時佢居然無喊喊, 仲同豆爸bye bye添呀 ! 結果細佬係啜住奶嘴同著住個睡袋入手術室架 !

手術真係做足兩個鐘, 做到10:00pm. 我哋入手術室嗰時姑娘話佢頭先醒咗, 喊咗一陣, 不過姑娘一抱佢就唔喊喇, 我哋接返佢嗰時佢已經瞓到豬仔咁喇 !

呢兩樽係喺細佬身上拎出嚟嘅物體, 不過我都唔知係咩, 醫生講完我都係唔明...

11月13日 (星期五)

醫生話手術後四個鐘可以試吓飲少少水, 如果無嘔可以飲返奶奶.

尋晚工人姐姐喺醫院陪細佬, 佢話半夜細佬醒咗已經自己坐咗喺度喇 ! 姐姐比咗少少水佢飲, 佢係咁飲係咁飲, 仲"禁"住個奶樽唔比姐姐攞開添呀 ! 梗係啦, 由晏晝三點幾到半夜兩點幾一滴水都無飲過喎 ! 後尾到朝早六點幾姐姐話佢喊得好犀利, 所以開咗奶比佢飲, 飲完又瞓過.

我哋去到醫院嘅時候佢仲瞓緊"膠豬"呀 !

右手手背仲貼住咗打麻醉針嘅傷口, 陰功豬呀 !

初時仲擔心佢手術個傷口會痛, 不過佢起咗身之後, 呢d憂慮都一掃而空喇 !

你睇佢幾活躍 !

仲企起身添 ! 好似完全無發生過任何事一樣 !

凱詩姐姐仲驚佢悶, 買咗呢個玩具嚟比佢玩呀 !

你睇佢玩得幾開心 !

仲好招積添 !

姑姐嚟到又同姑姐玩

仲"抆"姑姐d頭髮添 !

等到黃昏兩位醫生再嚟巡房, 佢哋話細佬仲生猛過佢哋喎! 所以就放我哋出院喇 ! 

呢個法國(醫院)之旅絕對貴過真係去法國走一轉呀 !  豆爸叫豆媽唔好再買嘢比細佬喎, 扣利是錢都唔知要扣幾多年呀 ! 我真係懷疑四百萬都唔知夠唔夠呀 ?