暫別Zennya

zennya今朝上飛機去左上海, 倒數埋就會上北京工作. 老實講, 真係非常之唔捨得.



魔人係先識clara再識zennya. 97年魔人出去做show已經識clara, 可惜一直都無機會同zennya一齊做過show, 反而老謙喺97年同過zennya出過一次show. 2000年魔人有機會同佢地兩姊妹同一班dancer一齊做野, 魔人就開始同zennya熟絡, 慢慢變成好似屋企人一樣. zennya係一個好有藝術天份嘅人, 佢做時裝設計時嘅作品非常出色, 往往叫魔人眼前一亮, 佢跳舞同排舞都好好, 又兼做一啲artist嘅形象顧問, 宜家搞化妝亦都頭頭是道. zennya本身亦都有藝術家脾性, 跳脫中帶點不羈, 一個字: 型!! zennya對朋友好好, 好錫朋友好關心別人, 佢亦都係一個非常開朗嘅人, 以前同佢一齊做野, 耐唔時就會聽到佢嘅開懷大笑. zennya仲同魔人一齊去過日本同長灘島, 今年仲同clara一齊帶魔人過珠海見活佛添! 今次zennya突然離開, 魔人真係非常非常咁唔捨得! 雖然佢話會不停期番落黎, 魔人亦都可以上北京搵佢, 不過始終覺得佢唔再喺魔人身邊. 好唔捨得呀~~~不過再唔捨得, zennya都已經番左上去啦. 今日魔人突登搵左好多佢啲舊相出黎, 黎個話當年先.



2006年, zennya生日, 去左食私房菜. 當晚其實魔人咳得好勁, 所以成晚飲暖水, 連之後落bar魔人都無飲凍野, 好少可咁乖啦~~~



clara生日, 同佢地一班人去左西貢bbq.



zennya帶魔人去見活佛, 當日其實佢仲病緊, 真係辛苦晒啦.



2005年, clara生日會. 當晚有好多dancer黎, 成晚係咁跳舞, 真係好開心呀!!



2004年, 同zennya同一大班朋友去長灘島. 哈哈~~~當時係魔人體重嘅巔峰期.



島上嘅spa非常清淨, 而且超平, 一個standard treatment都唔駛三佰蚊港幣, 魔人地喺嗰道幾乎做晒佢所有時段所有treatment.



2003年, 同zennya去打war game.



同clara zennya兩姊妹一齊出席一個化妝舞會, 你睇魔人跳舞跳到成身濕晒啦~~~



同zennya去船河, 好嘆咁晒太陽.



annual dinner合照. 魔人個財神look正唔正呢?



annual dinner後一大班人去唱k, zennya點谷都唔肥架啦~~~



新年流流, 上山頂行大運. 佢地著緊嗰套閃令令嘅衫係喺魔人師弟公司訂造, 經魔人介紹, 有少少折頭咁啦~~



2001年魔人生日會.



zennya同魔人一齊出席一個朋友嘅婚宴.



2000年一齊游船河. 佢地兩姊妹真係幾時都咁可愛架~~~



魔人隔離個女仔嘅生日會, 魔人同zennya一齊去玩. 哈哈~~~zennya無啦啦申個頭埋黎, 好搞笑!!



2000年尾開始, zennya同魔人租住同一個地方, 大家樓上樓下, 有個照應. 當日去左clara房開p, 中間嗰個你地估吓係邊個??



zennya生日會, 去左天與地飲二鍋頭, 嗰晚幾乎全部人都醉晒, 魔人當然唔例外啦!



clara生日會後去食宵.



zennya同魔人多年來建立左好深厚嘅感情. zennya大過魔人兩三年, 不過望落去就好似魔人大少少, 哈哈~~~所以都唔知叫佢做姐姐定妹妹好. 不過無所謂啦, 都係名一個, 佢鍾意嘅叫番魔人做姐姐都無所謂. 其實魔人同zennya都唔係見得好密, 有時幾個月都見唔到一次, 不過今次佢北上做野, 硬係有一種離別嘅不捨. 琴日上去佢屋企同佢傾吓偈, 臨走時魔人同zennya相擁左好耐, 因為真係非常之唔捨得, 不過幾不捨都要離開. zennya話最快可能農曆新年會番落黎過年, 係就好呀~~去滾搞佢屋企順便去埋詩詩屋企拜年, 著數著數!! 希望可以快啲見番zennya啦!



喺呢道祝zennya事業更上一層樓, 搵多啲錢請魔人食飯啦~~~