我的南華隨筆〔一〕

十多年前，好似記得我當時十五定十六歲既生日，我媽子俾五百蚊我過生日，我就攞住呢五百蚊去咗天樂里間元祿買咗一盒壽司，然後飛的去大球場，入場睇足總杯決賽。

(老實講，係邊隻杯，我唔係好記得，對手好似係麗新）

買張飛，入到去坐底，打開合壽司，前後左右D阿叔牛咁眼望住我盒壽司。

我記得個日阿度士入咗兩個波，仲其間好似撞爆個頭，包到成個阿差咁打足全場，呢種精神真係令我佩服。

贏咗波，好開心，成班南華球迷企晒係門口唔捨得走，我都有份等埋班球員出來上晒山我先走。

呢種感覺，至今仍然回味！