出糧喇~加人工喇~~

今日終於出糧喇, 哩一日真係等咗好耐, 因為最重要嘅關鍵就係睇吓加咗幾錢人工喇… Hahaha, lunch前收到張糧單, 開嚟睇… 嘩~~ 哩個數字簡直令我喜出望外, 亦都係我expect 嘅數… 真係估唔到公司會俾哩個數我… hahaha~~ 不枉我日做夜做, 勞心勞力, 死追爛追, 做到燥晒底呀… 不過數一數, 原來我已經做咗一年喇, 唉~ 咁就將我一年嘅青春俾咗哩間公司喇, 喺哩段其間, 真係捱唔少風風雨雨, 開心嘅時光可以話唔多, 甚至可能只有百分之五 (可能都俾多咗lu), 但痛苦嘅時刻就特別多… 唉~~ 幾時可以脫離哩度呀… 真係好想快d讀完書呀, 咁我就可以重穫自由喇~~ "唉" 哩個字都唔知每日或每個鐘講過幾多次… 唉~~ 我都唔想再唉落去喇…. 俾我停吓啦~~

喺哩間公司最常見同可以學到嘅就係 "推卸責任", "扮雙面人" + "唔用腦"… 等等… 而一d由我入去到而家都冇變嘅就係, 每次個M唔喺度時, 都會有d屎俾我執嘅… 而家嘅工作量亦都升級咗, 日日都好似做唔停, d嘢好似做都做唔完, 做嚟做去都係得個煩字, 日日就係為咗追單追單再追單, 走貨走貨再走貨, 仲有各樣大大小小嘅嘢, 日日都係不停咁做… 唉~ 好想放大假呀 ~~ 好想去旅行呀…. 應該係時候計劃吓嚟緊去邊度旅行至得, 再咁做可能會顛嫁, 雖然本身木星已經係一個顛顛地嘅外星人, 但佢唔想客死異鄉呀…