綿綿病左好幾天~ 開頭果陣見佢累累下唔係好想食野，星期日仲同佢去街街，希望佢開心D精神D，真係好似好左DD架。點知星期二晚去睇佢，肚子脹脹仲以為佢疴唔到屎屎谷住。
今朝媽媽話唔對路決定帶佢睇醫生，因為個肚肚真係好大個，成個籃球咁。開頭仲好一廂情願以為佢係狗流感，諗住睇完醫生帶佢上酒吧休息等我收工先去接番佢番屋企。
去到東方獸醫，話要驗血確診，一驗原來中左牛脾熱... 頂~ 死牛脾~ 本身都有同佢做開防牛脾既工作，點知原來係無用，隻牛脾有事咬左佢，佢就會中招，醫生話因為牛脾熱令到佢有慢性腎衰退，要吊鹽水三日幫佢排毒，OK~ 我地都唔係未試過，無問題。點知係要留院... 下~ 東方唔係24小時，咁成晚流流長，得佢自己一個，我地點會放心。同佢地FIGHT，講D野完全不合邏輯，因為我無去，我都係同媽媽電話聯絡，媽媽又俾醫生同我講，醫生轉述我既說話仲要呃媽媽話我話OK，無誠信~ 咁我都要醫架，OK~ 過錢俾媽媽，轉頭又話如果要留院就要照左超聲波確定佢個肚咩事先，又俾我哦一輪，做野可唔可以交帶得清楚D，我真係好忟~ 結果係佢個子宮發炎因為發得好勁要立即做手術，不過... 佢地唔接 就係因為我講左一句佢地果到唔係24小時~ 頂~
即刻打俾JENNY同WENDY幫我搵醫生，JENNY幫我搵左思恩，不過態度又係好差，SORRY呀JENNY，所以去左WENDY幫我BOOK既麥花臣，佢幫我BOOK仲要有9折。媽媽拿拿林帶佢出去，我就下午休息去麥花臣JOIN佢地。
見到綿綿差D喊出黎，雖然佢個人無咩野，全程貼住我個頭頂住我，但係諗起佢要做個好高風險既手術我真係好擔心，親手接佢黎呢個世界，我真係當左佢係囡，如果佢有咩事... 我真係唔咁諗~
醫生睇完綿綿既報告，建議我地立即做手術而且要留院，麥花臣係非常好，解釋得好詳細，話俾我知正常三日就OK，可以番屋企。得~ 我即刻簽字做。臨走抱左綿綿一陣叫佢要叻D要頂住，叫佢唔駛怕做左手術就會好番可以番屋企架啦，醫生話做完手術會即刻打俾我地報平安。
跟住硬住頭皮同媽媽離開診所，食D野跟住番屋企。一路上成日感覺到電話響，好擔心唔知佢會點，咁大個囡都未試過離開我地，仲要做手術，心都實埋。
到左5點收到電話，助手打俾我地話綿綿手術成功無問題，有事既地方已經切除左，不過麻醉未過。而家就要開始幫佢吊鹽水落藥去醫佢個腎衰竭既問題，叫我地放心，今晚都會有人留係診所幫我地照顧佢，精神好番D就會俾野佢食，呀~ 終於有番D腳踏實地既感覺，無事啦~
過左一關仲有一關要過，不過最危險已經完結 我知綿綿好叻會無事既。佢有探病時間，聽日放工就約埋媽媽去探下個衰豬~
保佑綿綿要快D好番呀~
DSC00588.JPG
DSC00587.JPG
DSC00586.JPG
