失戀有假期

據聞上海部份企業，因為體會員工失戀之苦，故容許失戀者取五天的「失戀假」以療情傷。

這措施是否體諒員工，加強企業「軟實力」（員工士氣和歸屬感，網友十一劃生語）不在此討論之列，在下感疑惑的是，若失戀，會想其他人，且是共事者得悉嗎？

表面或是膚淺地看，失戀多數係被人飛，咁無面嘅嘢唔通想四圍唱？就算同事唔笑你，反而同情安慰你，咁銷假後面對眾人憐憫目光又該如何自處？（若然上司姓甘咪仲「甘」？）

放五日？失戀果真佔人生中如此重比例嗎？老實說，有些人療情傷半晚就得，亦有些一世耿耿喎。

如有五天失戀假，個個要上班，自己獨留在屋中又該如何，喝至酩酊？哭到眼腫？定還是像孤男寡女裡的Kinki般狂洗厠所，咁洗五日呀，唔通？

失戀到底該否放假？又應做些甚麼呢？