陰招

近排公司發生一件事，我就真正領略到乜嘢係強姦民意喇。

話說上個星期公司突然宣佈喺公司入面嗰間紮根十二年嘅 credit union 分行由下年起會被另一間大銀行取替。我哋就梗係勁唔滿意啦，間大銀行度度都有分行，點解要喺公司開多間喎！ 我哋好鍾意依家間 credit union, 乜嘢都好過間大銀行，我喺香港都係用佢嚟提款，佢收服務費收得最少架喇。如果喺佢度要做任何按揭，息口係低過大銀行嘅。我有個同事就乜户口都係跟依家 credit union, 我就有一個 savings 同 checking 户口。

正當我哋議論紛紛，投訴公司點可以問都唔問吓我哋嘅意見就逼走 credit union 時。佢哋就有另一個宣佈喇：佢哋咁做完全有＂民意＂支持，調查顯示全公司有30%員工用大銀行，只有10% 用 credit union，所以佢哋係為咗員工先換大銀行喎。

但事實嘅真相就係當日嗰個調查完全冇提過個調查目的係乜，只係問咗一條問題：你 primary banking institution 係大銀行, credit union, 定其他？ 咁大部份人好似我哋咁買咗屋／車先入依間公司，咁唔會無端端將所有户口轉哂去依間 credit union 嘛。咁 primary banking institution 咪唔係 credit union 囉！ 而有啲同事直情連個調查都冇見過添呀！

就係咁樣，我哋中哂招，俾佢哋嘅所謂調查陰到，唔小心做咗幫兇，逼走咗 credit union。如果佢哋係問：你想邊間 banking institution 喺公司有分行，我好肯定絶大部份人都會揀 credit union，因為公司入面有一半員工都有 credit union 嘅 checking account。

設計依個陷阱嘅人一定知道民心所向先用啲咁嘅陰招，真係好衰格。依家經濟唔好，睇怕依啲陰招陸續有來，真係要小心啲先得。