親親乳牛@牛牛樂園

         

之前係電視節目, 見到介紹呢間牛牛樂園, 覺得幾得意, 同埋乳牛都冇乜機會見到, 所以嚟逛逛, 加埋今年係牛年, 嚟探吓牛牛先~

牛牛樂園位於粉嶺沙頭角公路81地段, 其實佢係屬於軍地範圍, 係粉嶺火車站, 乘搭經軍地既交通工具就可以。 九巴可揀78K, 小巴就揀 52B,52K,56B,56K, 車程大約15分鐘。  

     

 

             

 

就到入口, 就有幾隻狗仔係度迎賓~ (全部都係靚仔、靚女)~

 

原來入面養左好多狗架, 聽講呢隻係狗媽媽, 上面白色隻狗仔, 係佢生既~

 

唔知呢隻係咪狗爸爸呢~?!

 

呢度多數係比團體參觀既, 最少要30人每位就9蚊,  如果個別探訪, 要30蚊一位, 貴好多呢, 入到去有得試飲, 佢地斟比你, 呢D一樽樽既, 就要買既~

 

呢度地方唔係好大, 但係就養左好多牛牛~

 

             

 

工作人員帶我地去睇牛牛, 終於見到佢地喇, 真係好大隻啊, 望住佢地好有壓迫感, 聽講呢D只係牛仔, 未成年, 大約重900公斤~

 

可以買草餵佢地食, 每扎5蚊, 佢地見到草就係咁搶食, 好得意啊~

 

真係唔講你唔知, 原來同牛牛溝通, 就係大叫~WOW....佢地就知有飯開, 就會一齊回應~WOW.....個工作人員示範叫~WOW...所有牛房入面既牛牛, 真係一齊回應, 埸面真係好墟陷~

 

食到條脷都變左青色~

 

少少都唔好嘥, 食得是福~

 

              

 

牛痾尿, 好勁啊, 好似開水喉咁~

 

一對踩晒屎既牛蹄~

 

唔夠飽, 企圖想食樹上既青葉, 好有長頸鹿FEEL~~

 

            

 

呢個就係真空吸奶機~

 

呢邊呢D牛牛, 係大乳牛, 起碼重1200公斤~

 

             

 

後來, 有團體嚟參觀, 勁多人餵草, D牛牛發達囉~

 

工作人員向參觀人士, 介紹吸奶既情況, 叫人放隻手指入吸管度, 感覺佢既吸力, 我都有試過, 真係吸得好勁~

 

避開D人群, 行左去後山逛~

 

呢幾個小朋友, 係後山發現新大陸, 就係有一大堆草放左係度, 唔駛比錢買草, 任餵唔嬲~ 

 

睇吓, 就係呢堆草喇, 任攞唔嬲, 冇人理 ~

 

原來後山呢度, 種左一大片牛食既草, 天然種植, 貨原充足, 聽講佢地係用番D牛牛既米田共嚟做肥架, 唔好嘥嘛, 唔知呢D係咪叫有機種植呢?~

 

             

參觀完準備走囉, 行番出門口, 呢度有個小攤檔~

 

叫左杯朱古力鮮奶飲~

 

當然唔少得牛牛既精品賣喇!

 

               

 

覺得佢好靚狗啊, 毛色雜得嚟好特別又靚, 所以影多兩張相先~