牛頭角下邨

牛頭角下邨, 俗稱老人屋邨, 因為十居其九都係老人家, 好多後生既都搬晒出去喇。

呢度話拆話拆都講左幾年喇, 聽講今年落實清拆喇, 因為我係九龍灣返工, 所以間中會去呢度既大排檔食Lunch, 對呢個地方都算幾熟識, 亦有少少感情咁喇, 所以係佢清拆前, 都想影番D相作為留念, 一個畢竟有幾十年歷史既舊屋邨, 都有好多佢值得懷念既地方~ 

行行吓, 比我遇到佢, 一隻好乖巧既貓咪, 肥嘟嘟 D紋又好清晰, 唔驚人架, 同我玩又任我摸, 應該係有人養既, 但係有D擔心, 呢度就拆喇, 唔知佢會點呢? 希望佢主人唔會遺棄佢就好了~ 祝福你啊~貓貓!

擁有住舊式屋邨既建築設計, 特式係四平八穩, 排列得好整齊~

好古式古香既傳統藥材舖, 佢既擺設同器具都好古老, 出面仲放左D生曬藥材添啊~

原來屋邨裡面都有唔少理髮店啊~

呢度既櫈同電髮器材都好古老, 可以做古董啊~

聽講呢間源發既蝴蝶腩好出名, 可惜我唔識欣賞~

呢一排就係大排檔喇, 平時Lunch時間, 人流都好多架~

呢間係我間中都有嚟幫襯既粥舖~

呢間炭爐烘雞蛋仔, 當日大排長龍, 因為星期六/日好多影友嚟呢度影相, 人流多所以特別好生意~

呢度既玩具店, 買既玩具都好懷舊, 話唔定可以係度買到古董啊~

呢個黃色膠桶, 係古老既收銀機, 我諗依家都冇乜機會見到囉~

呢位亞姐當日又係勁好生意, 人流不絕~

呢個勁古老既收音唱機, 我諗依家都幾難搵到囉~

行完一輪, 都有少少攰同肚餓, 走左去食個下午茶順便坐吓, 又係勁多人, 全店都係影友既世界, 十居其九都係攞住部相機既, 我諗臨清拆前夕, 都會有好多人嚟呢度影相留念, 呢度既舖頭就把握住呢個時期, 臨尾衝刺, 可以賺番多少少先走囉~

牛頭角下邨拆左之後, 又會係另一新景象, 唔知到時會起咩呢?