coach workshop = body check

今年又參加左coach workshop. 仲記得前年個workshop 勁辛苦, 話哂我都一把年紀. 真係唔知再頂唔頂順...

同上次一樣, workshop 都係分兩日舉行.  係由台灣教練邱共鉦教授. 邱教練係台灣奧運金牌選手朱木炎既教練, 上次workshop 已經覺得佢教得好好. 記得上次第一日係操體能. 上完第一日成個人震哂, 散哂. 淨係開頭跑個20分鐘, 上落樓梯, 鬥快做12個動作共3 個round, 都己經搞到我想死. 當然最後尾都頂硬上啦. 經過第一日, 真係有考慮過第二日返唔返, 最後都係返左, 好彩第二日係做技巧, 有咁demanding, 不過都搞到我拉傷左隻左腳 (今年先鬆番d 咋). 所以上完個workshop 好似做完body check 咁. 

講番今年 (即係尋日同今日), 前已經同朱師兄講可能跑唔到 (由於早前操拳時落地唔好, 搞到左腳腳踭有d麻痺, 尤其跑步既時候特別 痛, 針炙完都係好番少少), 点知朱師兄聽完就算, 仲幫我報埋名. 真係擔心失禮自己館架...  去到香港仔運動場, 一開始就跑步, 經過上次經驗, 千祈咪跟人地既speed, 盡量放慢, 可以last 耐d, 点知其他人都跑得好慢, 唔通佢地同我想法一樣 ? 跑跑下有個肥妹 (竟然有人肥過我)頂唔順, 再跑一陣仲有個黑帶o靚仔quit 添, 真係估都估唔到. 最後我地只係跑左10分鐘, 比上次輕鬆. 跟住我地排隊兩個人一組對踢. 之後就係分組鬥快, 包括跑步, 單腳跳, sit up, 仲有推車仔添. 講到推車仔, 有幾個同組既女仔都唔玩, 我就梗係唔執輸, 一於揾個partner 先, 啱啱有個o靚仔揾唔到partner, 我就問佢同唔同我一pair, 佢話冇所謂, 但就怕抬我唔起 (哈哈... 咁又係呀, 事關我都唔少野). 我咪同佢講當訓練吓d 臂力羅... 佢最係都有推我, 但我就跌到瘀哂, 因為我隻手唔夠力羅...

查實今年的人質素差過前年好多, 體能唔夠好, 耐力亦都唔夠, 最重要係態度, 時時係教練講解既時候講野, 踢腳既時候又唔認真, 搞到教練都冇心機教, 好可能都係因為人既質素問題而減輕左運動量.

上完第一日, 雖然比上次輕鬆好多, 但腳板底個"枕"勁痛, 搞到行路成個機械人咁. 到第二日就集中係free fight 既對抗訓練, 操完之後, 發覺隻腳好似唔係自己咁, 尤其係落樓梯個陣, 真係要扶住欄捍行至得 (不過前年係行都行唔到架). 成隻腳面瘀哂, 個"枕"仲有瘀血添. 真係冇吋好肉. 聽日要早d 出門口返工, 事關以我而家機械人咁係步伐, 要慢動作咁碌番公司.

** 上次同今次好有人低估我既年紀. 哈哈 !!! 好似上次, 有個黑帶師姐問我係咪青訓既. 至於今次, 呀肥妹仔話有d動作做唔到, 我就叫佢盡量做, 点知佢同我講 "如果我地做到依個動作, 我地就入左少訓啦"... 真係唔知好嬲到好笑, 第一, 個動作我係做到既, 第二, 我第一日識佢咋, 好似同我好friend 咁, 最後, 我咁多high light 既白頭髮都話我係少訓, 佢真係見得世面少羅...