媽咪都是這樣長大的

前幾日媽咪係facebook搵到佢細個住個條村d相~~知唔知係邊條村呢~~一陣先開估~~

右上角箭咀就係媽咪細個住嘅地方"第八座",係呢度有好多媽咪嘅童年回憶架~飛機欖啦~樓下嘅豉油麵啦~跳樓梯連踩三次屎啦~係六樓樓梯碌落五樓,整到左手甩"教"啦~百厭係門口跌爆個鼻啦~~去厠所玩水俾人打到飛起啦~睇對面樓打色魔啦~~拎痰罐當帽帶啦~~~

最記得就隔離屋個家人,婆婆同媽咪叫個男戶主做"王八蛋",點解叫"王八蛋"呢~因為佢姓王,而佢係一個好衰,又八掛嘅八公,所以咪叫"王八蛋"囉,話說係媽咪細個個陣因為婆婆同佢有d恩怨,佢居然用殺蟲水噴我媽咪~好彩媽咪大難不死啫~重有唔知點解佢次次都針對住媽咪,成日係d街坊面前笑我媽咪架~~當然媽咪亦唔係善男信女,人仔細細已經同佢舌劍唇槍~見一次鬧一次~我諗媽咪依家一身鬧人嘅功力就係當時訓練出黎架啦~~

講番張相先~斜對面嘅第五座就係媽咪讀個間小學"博智小學",個陣返學真係好方便,行過對面就係,真係遲d起身都唔驚遲到呀~~不過係媽咪三年級個陣就搬左去天馬苑lu,如果行路大概15分鐘到啦~~

講開飛機欖~真係好好玩架~~個陣媽咪住6樓~當佢地一聽到樓下有人叫飛機欖~就會問婆婆拎錢再極速跑上7樓~再叫停樓下買飛機欖個叔叔,跟住掉一包用紙包好嘅碎銀落樓下~~最後呢個叔叔就會表演佢嘅絕技"掉飛機欖"喇~好勁架~7 & 8樓都掉到架~重好準架~~咁d飛機欖好唔好食呢~~唔知喎~因為睇完表演d飛機欖就送晒入公公同婆婆個口到lu~~

媽咪記得佢地間屋出便大概同呢張相都差唔多~不過係屋外便就有個廚櫃,唔係放碗個d櫃喎~個櫃裡面係放煮食爐~應該係煤氣爐同火水爐~煮飯個陣就打開個櫃~煮好就鎖番好~重有係走廊頂多數都會放涼衫竹~洗好d衫就掛上去~好方便~重有..如果係走廊玩個陣要好小心~因為有好多小強係地下走黎走去~一個唔小心~就踩中~~

呢張相中間嘅位置應該係公共厠所~個陣係冇自己嘅厠所~一定要走出去先可以方便~不過人仔細細要夜晚行出去都咪話唔驚~所以每家都必備"仿紅X牌小痰罐"一個,夜晚用完,朝早自己拎去洗~洗乾淨咪當帽帶囉~成個KELLY咁呀~確係正呀~~

講到洗痰罐一定要介紹一下"水房",咩叫"水房",以前7層大廈係唔駛交水費架~有一達大概200呎嘅地方~有兩條水候~呢個俾人洗嘢嘅地方就叫"水房",係呢度咩都有人洗架~洗菜,洗衫,洗鞋,洗碗~小朋友甚至係度洗頭沖涼同玩泡泡添呀~媽咪當年都試過係"水房""美人出浴"架喎~

講完媽咪間豪宅,又要講下媽咪細個嘅消遣~~第一樣一定要講有兩層樓咁高嘅滑梯,呢款滑梯一定要係中午12點至2點玩先過癮,因為條滑梯面係用鐵板做嘅~試諗下中午曬到塊鐵板熱辣辣,一坐落去再滑落黎,係唔係好過癮先!?

跟住就要講下呢D可以換衫嘅,紙板公仔~以前冇錢買芭BI公仔架嘛~CINDY都唔夠錢買呀~咁唯去文具鋪或者報紙檔買呢D紙板公仔,唔記得幾錢~淨係記得次次都玩到個頭甩左~再用膠紙貼番好再玩過~

見到呢部嘢,媽咪就想同細強表舅父SAY 聲 SORRY~以前細強表舅父借過呢款遊戲機俾媽咪~咁老馮都係唔見左啦~真係十分唔好意思~我媽咪就係咁唔小心架啦~~所以我媽咪D朋友,自己執生啦~~

講完玩~一定要講食啦~呢款爆炸糖唔知以家重有冇得買呢~~

重有呢款印水紙香口膠~係隻手到加D水,再將張包香口膠嘅紙貼上去~就變左一達化開晒嘅紋身啦~~不過媽咪有理冇理都要貼呀~型呀嘛~~~

煙仔朱古力,好難食~不過真係好似煙仔~媽咪真係試過點火架~咁點!?張煙紙濃左,朱古力溶埋囉~~

"乖乖"~一打開唔係食裡面個D嘢,係拎左裡面D玩具先,包玩具個袋肥淋淋~個玩具又唔識玩~所以唔係太好~~

最後呢個真係經典呀~~位於尖東嘅"出奇老鼠",媽咪記得呢間嘢係食PIZZA嘅,裡面有D機械公仔會唱歌~當時真係好新奇架~就好似依家迪迪尼咁囉~媽咪估係個度食嘢應該唔平~不過公公同婆婆就好願意帶媽咪三姊弟去玩~所以公公婆婆~~媽咪好愛你地架~因為你地咁錫佢地,佢地知架~~

講完D咁肉麻嘅嘢之後,要開估啦喎~~登..登..登..登......"橫頭磡村"~~唔好噓呀~~~其實到媽咪結婚之前都重住緊係個條村~不過依家叫樂富之嘛~~~

遲D再叫媽咪拎D私人真藏相俾大家睇下啦~~~