泰梳肝曼谷華欣10天之旅(Day 2 預祝生日篇)

今日繼續15號 Day 2, 晨早8點彈起身梳洗, 然後落去Momo Cafe食早餐,

話晒係Apartment, 早餐款式普普通通,

當然唔會有半島果隻陣容頂盛的震憾 Feel啦!

(坐係Cafe入面, 影下個外圍先.....)

 

(影埋個內圍, 無咩人喎, 超正!)

 

(裝修都幾靚)

 

(沙律 + 雞肉, 幾清新)

 

(近排膽固醇超標, 但又要去玩喎, 所以食早餐時就避免食蛋蛋,

只係食下麥片 + 無脂奶 + 腸仔多士咪幾好囉, 其實都係避得先避咋,

避唔到當然都會照食啦, 因為我要留返d Quota黎食Lunch同癲拿架麻,

嘩哈哈哈哈哈!)

 

(肉丸粥都唔錯呀!)

 

食完早餐, 就出發去訂夜晚的預祝生日餐啦,

行左去酒店附近只需10分鐘路程的珍平酒家訂野啦......

(我地訂d乜??? 睇落去咪知囉, 呵呵! )

訂完野, 就行去7-11增值電話卡,

黑面爸爸一野就幫我增左Baht 500, 即港幣116蚊,

入咁多, 有排打囉, 所以我每日早午晚三次

都打比公公問下哥妹鬼豆近況啦!!!!

增值完畢, 搭MRT去Siam附近行街街,

係Siam Paragon地庫有間食棉花冰冰喎, 就試下啦,

反正香港果d我都未試過......

(綠茶紅豆冰冰, 好甜好漏呀, 麻麻地! )

 

(呢個係香桃味冰冰, 呢個唔錯呀, 酸酸甜甜! )

行左陣又到Lunch時間, 去左Siam Square入面好多人都讚好的

媽媽的家食泰腳野, 我唔記得個名點串啦, 唔記得都無所謂啦,

因為我都唔會再去囉......

(先黎兩個椰青, 唔係太冰凍, 差少少!)

 

(冬陰公, 無咩記憶, 無記憶即係唔係好好味囉! )

 

(椰青咖哩海鮮, OK啦!)

 

(木瓜絲沙律 + 大蝦炸春卷 = 算幾好味 )

 

(炒通菜, 埋單食左Baht 700, 即港幣162蚊,

呢間野質數普普通通, 無驚喜, 下次可以唔駛去! )

好啦, 訂左夜晚6點去拎外賣返酒店, 我地準時去到珍平酒家,

就見到下面呢盒非常Cuite的大紙皮盒裝住左........

究竟係食乜黎預祝我生日呢???

 

~~~~燈.燈.燈.凳~~~~~

~~~~~~~~~

~~~~~

~~

~

就係外賣 乳豬一大隻啦, 哈哈哈哈哈!

(泰腳燒乳豬都有一手喎, 燒到熱辣辣, 脆卜卜, 好鬼死好味......)

 

(魔人亞鬼都要同個豬盒影下相先喎! )

 

(買左兩支酒精飲品返酒店, 前面係青檸特飲,

後面橙色係Screwdriver, 酒精得幾度, 因為一陣仲要去行

Suan Lum Night Bazzar, 所以無開紅酒啦,

黑面爸爸話廢樹醉醉地咁行夜市喎, 哈哈, 無鬼用!!!!)

 

(Cheers!!!!

唱隻生日歌仔先:

祝我生日快樂~~~

祝我生日快樂~~~

祝我生日快樂~~~~~~~~

祝我生日快樂~~~

自己唱比自己聽, 係唔係好特別呢?

嘩哈哈哈哈哈!!!!!!)

 

(好, 唔講咁多, 齊齊落手落腳開餐啦!!! )

 

(睇下有埋乳豬醬同包仔夾住食架,  係酒店房開餐, 寧捨豬服及自由!

呢隻豬價錢係Baht 1600, 即港幣372蚊, 價錢同香港有得揮架,

係度都要多謝黑面爸爸的細心安排, 哈! )

擦呀擦, 擦左大半隻後, 我地都飽飽地滯滯地啦,

8點半左右就起行去Suan Lum 行夜市啦, 真係好, 間酒店好近夜市,

所以只需徒步15分鐘左右就到囉, 食飽當散步都唔錯呀!

當晚行左陣就係夜市做腳底按摩, 按左45分鐘,

每位Baht 250, 即港幣58蚊, 再係街邊一人食左一碗魚膘羹,

Baht 95, 即港幣22蚊, (呢期好鐘意食魚膘羹, 哈!)  

然後好滿足咁返龜訓覺覺豬啦!

Day 2完畢, 請繼續留意 Day 3 生日兼露肉篇,

嘟嘟嘟~~~~~~

 

如果想重溫呢個旅程, 請Click以下網址:

泰梳肝曼谷華欣10天之旅 (前奏篇)

泰梳肝曼谷華欣10天之旅 (Day 1 酒店篇)

泰梳肝曼谷華欣10天之旅 (Day 1 美食篇)