泰梳肝曼谷華欣10天之旅(Day 3 生日篇)

今日繼續 Day 3行程, 因為Day 3, 16號係我牛一, 所以會由朝慶到晚,

其實生日年年都有, 但今年無野撈, 所以搵個藉口

去泰腳食下玩下遮,  嘿嘿......

晨早起身食完個早餐後, 就陪黑面爸爸落去酒店個咸水泳池度游水,

(呢間酒店講到明呢個池係咸水黎架, 又幾特別,所以d水都綠d喎! )

睇下魔人亞鬼的池邊風光先.....

好啦, 有肉睇, 洗淨對眼未????

仲有對肉手添, 哈哈哈.....

影完魔人亞鬼同傻仔游完水後, 我地出左Emporium個商場行街街,

岩岩食Lunch時間, 就周圍搵下有咩好野食啦.....

見到有日本野食喎, 就一於生日黎個日本Lunch啦!!!

(呢間日本料理店叫日本海)

(室內裝修都幾靚架!)

(坐低又黎杯西瓜Shake Shake, 係泰腳無時無刻都飲冰冰,

因為實在太熱啦, 要飲冰冰先降到溫囉!)

(雜錦Sashimi, 好味同新鮮過Fuji好多!)

(唔知呢條咩魚, 燒得唔夠乾身, 乾少少應該會好味D)

(再黎叫左每人一Set的Set Lunch, 有前菜, 湯同飯.....)

(大蝦天婦羅, 蝦蝦大隻兼彈牙喎!)

(炸魚一碟, 呢碟就正啦, 香脆可口,

岩晒我胃口架, 因為我最Like香口野, 哈哈哈哈哈!)

食飽飽, 埋單Baht 1200, 即港幣280蚊,

呢間可以再Encore!

食完繼續行街街, 商場入面好得意呀,

呢期Promote愛護動物, 放晒所有稀有品種比遊客參觀,

咁多動物中, 我好鐘意下面果幾隻, 我覺得佢地d鬼鼠動作

好似亞豆呀, 嘩哈哈哈哈, 實在太太太可愛啦!!!!!!

睇完動物再行左陣街街, 然後返左酒店放低戰利品,

坐下Hea下飲下野, 聽下歌仔.....

(係Siam Paragon間超市買左一大Jar Meji 古古力奶,

難得安排左4日同一間酒店, 所以我地一得閒就飲D, 

超好好好好好好好味呀!!!!! )

嘆到夜晚8點就打的去Victory Monument 的

Saxophone Bar慶生日啦......

(先黎一人一大杯泰腳出品的Singha生啤, 因為入面環境太黑,

無用閃光燈下, 我較左大光圈同 iso 1600黎影, 所以微粒勁粗! )

(叫左兩個小食, 呢個係小食拼盤, 樣樣有, 仲好大碟添,

但個伙計就唔比我地再叫啦, 話夠啦喎, 哈, 咁都有,

唔比人食野架? )

(大大碟煎蠔餅)

(擺設好懷舊Feel)

(有Live Band, 我地就係為左呢樣先黎架! )

(呢個主音肥仔好唱得下架, 佢唱晒幾十年代的Jazz Music,

成間Bar氣氛好熱鬧, 好正好好Feel.....)

(左邊果位泰仔好似歌神Sam Hui個仔,

唔通香港無得撈, 過左黎泰腳夾Band? 哈哈哈!)

睇完相, 不如黎睇下短片囉, 不過暗暗地架,

但都交下功課比大家睇下....

每人再黎多Round Singha啤, 然後聽到11點就走人啦,

埋單只係Baht 1000, 即港幣232, 真係抵爆!!!

(頭先食左咁少野, 所以返酒店途中, 係附近的推車仔檔,

買左海南雞飯當宵夜, Baht 40, 即港幣9.3,

都幾好味, 食飽飽就可以就枕啦, 極滿足! )

好啦, Day 3生日篇玩完, 再黎會係Day 4,

請密切留意, 嘟嘟嘟!!!!!

如果想重溫呢個旅程, 請Click以下網址:

泰梳肝曼谷華欣10天之旅 (前奏篇)

泰梳肝曼谷華欣10天之旅 (Day 1 酒店篇)

泰梳肝曼谷華欣10天之旅 (Day 1 美食篇)

泰梳肝曼谷華欣10天之旅 (Day 2 預祝生日篇)