廸士尼攻陷記

尋日全校去左廸士尼，情況當然係同我想像中一模一樣，可能已有心理準備，所以佢地嘅瘋狂已一早接受，反而係個導遊有d滴汗！

一入場就已經激死我，第一個入去嘅學生就已經話無帶全年通行証，咁咪唔入得住囉！樂園入場前要查袋，問有無人帶剪刀，無端端點會有人帶呢！係咪？哈！點知有個學生真係有帶！你話死唔死！帶剪刀做乜呀？咪收左佢成個筆袋囉！

呢個景一入門口就會見到啦！好似係火車站！

之後我地分班上廸士尼嘅課程，有導遊帶，為時三個鐘！開頭勁擔心，三個鐘，佢地一定唔得啦！實出事呀！但原來佢地係帶d學生四圍走，認識樂園設施嘅同時，亦都話比佢地知點樣有廸士尼！係從遊戲中學習！

導遊帶我地去左玩巴斯光年、咖啡杯、4D影院同睇獅子王慶典。第一次睇都覺得幾得意。班學生當然係勁鐘意啦！瘋狂指數去到極點！佢地唔係行，係跑啦！衝啦！同大叫呀！有ｄ係開心激動到打人呀！同放監係無分別！一大叫，其他人又望住你啦！失禮呀！佢地每去完一個地方都要做小小功課！咁當然有部份同學係遊魂，成日自己遊開左去，真係好想攞條繩一個綁住一個咁行，咁我地就唔使咁辛苦！

呢個咖啡杯轉到我傻！自轉加公轉，公轉係由佢地控制，但自轉就由自己隻杯控制！ｄ學生起勢咁轉，你話死唔死！好彩我同西芹仔一齊坐，無乜事！

獅子王慶典我相信最多睇兩次好啦！我有好多同事都話悶，好多學生話唔好睇，甚至訓左！加上講英文，佢地梗係話唔好睇啦！我就覺得劇情係唔係咁好，不過無辦法，將成個故事縮到用半個鐘倒做出來係有ｄ麻麻，但舞台運用同調導係好嘅！

完左個課程後就食午餐，可以休息吓！嘩！成＄４０一個飽呀！！！！我真係接受唔到！所以無食，我只係食自己帶嘅餅同食學生ｄ薯條！哈哈！有ｄ學生都好好嘅！但又唔食得多，驚個胃唔得！

唉！連廸士尼都係擺ｄ咁悶嘅聖誕樹！真係唔得！

呢架車好靚呀！仲有一架兩層高嘅巴士，好鐘意！不過係另一架相機到，未有得睇！

美國小鎮大街嘅一角！

呢度都可以攞錢喎！

個洗手間無乜特色！有ｄ失望！

呢個好似係小小世界嘅入口！

多人到死，點玩呀！所以好多都係得個睇字！

因為要睇住班學生，所以我都無乜時間可以去遊覽，而且玩到三點幾就要走，上完堂都已經一點，其實自由時間都係得兩個鐘頭倒！雖然廸士尼係好細，但兩個鐘又真係玩唔哂！所以今次影左好少相！

離開嘅時候遇正巡遊，ｄ學生一見到又起勢跑出去，走入人群到睇！當然，佢地有ｄ係無問老師就走左去，有ｄ係通知老師就即刻跑出去，要阻止都唔得！咁多人！點搵佢地呀！唯有同另一位老師分開帶學生到正門集合！唉！我都明白去玩係好開心，應該放吓佢地，但都要自制呀！

如果個時我做廸士尼，可能企係上面個米妮就係我！

好好笑，ｄ公仔戴聖誕帽！如果巴斯光年戴埋仲好笑！

巡遊時播放嘅聖誕歌係將傳統嘅歌曲重新編曲，好現代，好好聽，所以點解廸士尼樣樣嘅版權都睇得咁緊，呢樣野佢又真係有資格嘅！完左後，ｄ人開始散，我帶住部份學生行出正門！一大班人跟住巡遊車行，好似遊行咁，感覺幾得意！係大街到開始噴雪，係泡先啱！成條小鎮大街都係泡，真係好似落雪咁！好好氣氛！呢樣真係做得好好！係我全日係呢度最開心嘅一刻！

準時上車返回學校，一齊都總算平安！收到信息唔使錄音，有時間，哈哈！去左上環同中環影夜景！我好鐘意上環、中環同西環嘅夜晚，有時間當然要影吓啦！

呢個廸士尼真係好細，我唸細過維多利亞公園，基本上係唔需要地圖，好快就會認到路！唉！好似有ｄ唔值！政府比得太多錢啦！

如果大家入去玩，睇４Ｄ影院的話，建議大家唔好坐咁前，我就係坐前面，睇到想死，勁暈！根本就聚焦唔到！或者係我對眼有問題啦！我見ｄ學生睇到勁開心，又係勁叫！不過，佢地係咪都會叫，只要有機會！

廸士尼係一個好有夢想嘅樂園，入到去個個都好似變左你嘅朋友，係入面玩真係有個去左另一個地方嘅感覺，無憂無慮，係可以令你投入去玩！同現實係有ｄ分開，唔同海洋公園！所以想逃避一下現實嘅時候，入去行吓都好！

我記得ｄ學生玩旋轉木馬時，有個廣播叫人坐定要開始，佢段說話係咁：

「各位國皇、皇后、公主同王子，請你地坐定，旋轉木馬現在要開始啦！」聽到我有ｄ滴汗！

另一樣我最鐘意嘅係裏面乜野都可以影相，任影，唔會有人話，極好呀！

如果有機會都會想再去，係因為想影吓相！

有兩個學生拾到錢，一個使左買左三把劍，一個就比左老師！原來廸士尼好多錢拾！但另一方面，跟左佢地三年，我開始發現呢一班學生係一班好好運嘅人。