I've got a bad headache

經過昨天又濕又凍的天氣，媽打可能因為穿了單薄的衣裳，所以著了涼。今早返到公司上班已覺得頭昏腦漲，吃過早餐後就食咗一粒extra必理痛，希望可以頂到放工，可惜止唔到頭痛，經過一個早上的工作，頭痛未有舒緩.........

所以午飯後再食多一粒extra必理痛，怎料反而覺得開始手震及腳軟，心想，可能係我overdose，所以藥力過猛.....好不容易才捱到下午3點，終於頂唔住，開始反胃及作嘔，所以立即同上司表示要早啲回家休息。

在乘車途中口腔已不斷湧起很多的口水，這正是想嘔吐的徵兆....幸好那是非繁忙時段，行車時間比平時暢順，加上今日舉行會考數學科考試，大小姐同功夫小子的學校做會考試場，所以佢地放假一天，於是我叫功夫小子到車站接我回家。

巴士終於到站了，準備下車之際，功夫小子已見到媽打在車廂，走近車門接我，可惜前面的婆婆行動頗慢，要花上比常人多的時間才從落車的閘口成功到達地面.....媽打唔係嫌婆婆行得慢，但我心想：「我快忍唔住喇，婆婆你再唔行快啲，你係我前面就遭殃喇！」.....感覺上，婆婆落車果幾秒好似過咗好耐，好唔容易才接觸到功夫小子，一手將隨身物品交俾佢，手中只握實一個居家旅行，嘔吐必備嘅救命膠袋，只對兒子說了四個大字........."媽咪想嘔"........

一切盡在不言中，媽打盡情地嘔；有潔癖的功夫小子雖然見到自己媽咪係佢面前製造緊一個咁震撼嘅場面，可是他仍然乖乖的站在一旁，還為我遞上紙巾.......即時嘔吐了，人立即輕鬆好多，兩母子便踏上回家的路途。

返家後睡3個多小時，到了晚飯時間便好轉了，還可以吃晚飯和繼續寫blog和去探blog友。

各位不用擔心，我已經好好多了，明天可以照常上班！早抖！