點解咁扭計...

B囡第769日大 & 細B第337日大

近期, 細B真係超勁痴身, 痴身到媽媽覺得好煩擾, 嚴重拖累媽媽每日嘅工作...     唉~ 痴身到唔識講!!!  就連就咁用雙手抱起[未擺埋心口]都會喊到癲晒, 無時無刻都要痴實媽媽, 就連瞓覺/玩玩具/飲奶...  扭抱扭抱扭抱....   喊喊喊喊...  真係喊到媽媽心煩氣燥!!!!...     

差唔多全日都要抱住細B, 基本上乜家務都做唔倒, 唯有上網睇吓野...     無意間睇倒一個媽媽打嘅一段野, 內容大至係 講佢個女[同B囡一樣大] 從來都唔會出手打人, 就算遇到唔公平嘅事/被人搶玩具等等, 無論佢個女幾唔願意都好, 都會好自然咁鬆開手, 由得人地搶走本來喺佢手嘅野...   該媽媽再解話話, 佢個女唔搶人野, 唔代表佢怕事, 而因為得一獨女, 出世至今, 萬千寵愛, 要乜有乜, 所以唔會有想同人爭野嘅意欲...   

雖然好似唔太關事, 但該段文字令媽媽諗起好多野...  係咪因為B囡感覺唔倒爸媽嘅疼愛, 所以經常出手打人呢?!...    係咪因為太早生細B, 引致B囡成日打妹妹呢?!...    係咪媽媽唔識教女, 引申出女兒種種不良嘅行為呢?!...   唉~ 越諗越唔開心...

昨天B囡上Playgroup嘅日子, 但因仲未病好 , 所以改左今日...   點知...  B囡昨晚竟然深夜喪咳...  仲咳到嘔左兩次...  全晚都瞓唔林...       媽媽傷心ing...  眼見B囡只係普通嘅流鼻涕, 睇左幾個唔同嘅醫生, 醫唔好之餘病情竟然仲越黎越嚴重, 真係火滾 +心痛!!!... 

下午...  雖然決定唔返playgroup, 但"麻甩蕉"都準時到達...    襯B囡仲未傳染細B, 媽媽又要極速帶B囡去睇醫生喇!!!    "高醫生"仍放假中, 好彩同場有另一醫生, 打電話問清楚, 同場藥物係一樣, 媽媽先放心帶B囡黎睇!!...   可憐嘅B囡只係普通嘅流鼻涕, 竟然食左大半個月藥都未醫好,  磅重時真係嚇媽媽一大跳, 竟然由 兩歲時嘅 13.8kg[30磅半], 跌至13.4kg[28磅半]...   不增反減, 嘩~ 媽媽勁心痛呀!!!... 

高醫生放假中, 診所客人都少左大半, 好快就到我地睇...    可憐嘅B囡變左氣管炎+聲帶發炎+輕微發燒 T^T     陰公豬~  攞藥埋單 $390...   yeah~ VIP擁有嘅king size藥水[五日藥, 一般人都係三日藥喳]^^  咁大支藥, B囡話 :唔要啦~ 唔洗客氣!!!...  哈哈哈哈... 希望今次會段尾啦!!...

夜晚...  爸b早左放工, 一返到黎放底個袋就話要落街"打波", 出奇地竟然唔帶B囡...B囡見爸b返黎又再走左, 即刻癲狂喪喊...   媽媽氹又唔係, 抱又唔係...  又忙緊煮餸, 所以由得B囡喺廳喊喊喊喊...  一心諗住佢喊一陣就無野...   點知...  個傻妹襯媽媽入廚房煮野, 竟然癲左咁張間屋反轉左, 掉到一地玩具, 撕爛晒啲紙, 反轉晒啲櫈...   仲竟然自殘身體, 喪撞頭埋牆, 撞到嘭嘭聲...  第一次撞到出血都仲繼續撞...    原本媽媽都唔打算理佢[醫生話過越理越嚴重], 但因實在好似鬼上身咁, 好恐怖!!  媽媽心軟就去抱吓B囡, 點知, B囡喪反抗發癲, 仲抓傷自己添 @@"...  唉~...  咩料呀?!?!...    

嘩~ 科技真係日新月異...    肉眼睇唔倒嘅野, 用相機一shoot, 一目了然...      個籃球場離我地屋企都有兩個街口遠架!!! 咁都影倒爸b打波實況!!     哈哈~ 勁!!!...

媽媽又攪又抱又錫又氹又唱歌...  加上爸b打完波返到黎...    B囡嘅情緒先正常返. 開心返喳!!!!...   可能係近日食得太多藥, 攪到B囡咁燥狂掛牌?!...  冷靜落黎, 又夠鐘飲支"加料奶"... 

細B又唔知忟乜野?!?!  一放佢落地就扭扭扭扭...  想點呀?!?!...

全日黎講, 就只有晚飯時候, 唔會喊, 乖乖等食...   呼~ 雙耳終於可以靜落黎...   依個細B次次食飯都整蠱做怪, B囡又跟埋一齊癲...     有時佢兩個真係曳到, 死九十次都唔得你死; 但有時又古古蠱蠱古靈精怪, 氹得人好開心~    一見佢地無憂無慮嘅傻笑, 全日嘅憤怒即刻無晒嚕^^ ...