林林小姐III

好耐無同各位滙報林林小姐的成長進度,各位契字輩請留意以下數字:
體重:9.4kg(約21磅,半年先重咗一磅咋,食極唔肥明顯係爸爸家族遺傳)
身高:78.7cm(高妹身形仲keep到)
頭圍:46.2cm (護士姐姐好似度錯咗位置,未必準確)

林b已經喺14個月大前學識行路路喇,成日會喺屋企好似婆仔散步咁swing住對手行;有時候,林b仲會跑下步o忝(通常見到有嘢食o既時候)。
林b同時又喺15個月大前放棄行路超過5分鐘,並且施展扭抱功勢,若然扭抱失敗會進一步扮跌,務求令你抱起佢為止。但據林b解釋扭抱其實另有苦衷,目的只為幫媽媽減手臂,等媽媽手臂幼晒就會繼續行路咁話。 

15個月大o既林b還練成細路秘笈中的最厲害招式---扭買嘢! 每逢入到百貨公司,見到公仔要買見到衫要買見到杯要買,就連屎塔仔都唔放過,一坐落去就唔肯起身,十足十坐住邦邦個金塔一樣。扭買嘢呢招獨門絶學,本來專門對付鬍鬚教既荷包陣;但係此招一出,竟然傷及嫲嫲同較少見面o既婆婆,可算殃及池魚。

近呢個月,林b染上怪病,稱為「食懵症侯群」。患者會亂咁叫原本認得晒o既親人,例如叫嫲嫲做「媽媽」,叫叔叔做「爸爸」,仲會喺街見到任何男人都叫伯伯(真係伯伯就梗係好開心,仲會讚佢乖;但係有啲只係叔叔輩的,都唔知啋唔啋你好),唔單止叫,仲係要指住嚟叫,想扮聽唔到都唔得！呢個病暫時未搵到成因, 亦無得救。

林b自小已經鍾意小動物，呢種善良性格反映於佢同cobi平日相處。自從林b識行後，好鍾意行去搵cobi玩，經常失驚無神行去cobi面前，踎底、奸笑，然後出手.....通常到此為止，cobi已經驚到彈開，其實林b只係想指住cobi隻hand話返俾佢知呢隻叫「鋸鋸（腳腳）～」。林b亦深明「打者愛也」道理，每次cobi行過佢都會以親切聲音講句「dada」，同時間雙手已經從cobi背脊對上的半空墜落.....另外，有時候趁各人唔在意，林b會一過閃身行入廚房，用腳踩下cobi個食物兜，又或者用手摸下cobi個水兜，對cobiｏ既膳食十分關注。