January 25, 2008《Star Light Joey Yung Concert 2008》

這必定是joey多個演唱會中，最好睇的一個，問題就是太短。

差不多九點開場，十一點便完場了，最後一首歌的最後一粒音還未完全停下，場燈已開了。最後全場起哄五分鐘後，joey就像當年第二個紅館演唱會一樣，再走上台再唱一次《痛愛》才真正完場。總係覺得唔係好夠。

今次音樂班底換上青山大樂隊，在音樂上未有好大驚喜，但整個流程的確令演唱會好看不少，至少，沒有送禮環節，打亂睇演唱會的心情，又沒有間場的英皇嘉賓，全程都係joey一個人唱自己的歌，比以前幾個仍會唱別人的歌的演唱會，就是肯定自己夠歌夠能力去做一個完完全全屬於joey的演唱會。

一開始joey像個音樂盒公仔般轉上台，但唱完一首又轉回台下換衫唱快歌，這系列都是屬於side track的歌，旁邊幾位狂迷般的小妹妹，竟然唔知係咩歌，好笑！不過更好笑的係，後面傳來陣陣飯香，原來本人後面的觀眾在「開飯」，雙眼再掃過一點，旁邊的兩位在開「熱浪」……經過多次的joey演唱會經驗，觀眾一向是較「冷靜」的一群，昨晚身處的周邊觀眾亦不例外，唱快歌都可以保持呆滯靜止狀態，勁！幸好到最後快歌環節大家都終於肯郁下，唔係我真係驚佢地係蠟像。

不過開頭幾部份的確太多上台落台位，令人有點難適應歌與歌之間的變化。

最歡喜的兩個部份，其一是《螢》至《黃色大門》，這一段不但有動畫，更有一系列好清簡但又充滿想像空間的白紙裝置，歌同景都好夾好靚，好係一個新的joey。另一部份係跳足二十分鐘的快歌，一連串超力量型的舞，幾次都係倒樹蔥一落地即開聲唱，加上整個音樂編排超正超好玩~~~~~跳到腳軟！

值得一讚的是，今次附送的螢光棒，也是多年來最有心思和貼題的，就係這個「小星環」，不過，身旁那位在演唱會還未到一半，就突然遞上只剩螢光燈頭的棒，小星星已不見了~~~哈哈哈！低能！令「小星環」即時變身廿年前最元祖級的螢光燈棒。

今次另一突破當然是推出了一系列演唱會紀念品，本人一向不愛買演唱會紀念品，但原來最想要的joey畫冊係收埋在miffy x choffy的公仔內，所以付出了$280。不過$280有齊miffy+chofy+畫冊+貼紙，其實抵過300蚊買一件tee，加上choffy的製作的確幾仔細，最鍾意個咪仔，包住黑皮不特止，仲包埋魚網添~~哈！