Subaru Impreza WRX STi

呢架係我其中一架最滿意既作品, 落左地兩年, 記得係2006年整好架....

今次製作冇上底灰, 直接用田宮TS-50 MICA BLUE 噴上, 事前當然要先磨走車身既分模線先啦! 之後洗乾淨車殼乾左後首先輕輕噴幾層TS-50, 之後可以噴厚少少, 總共噴左四五層

貼好水貼之後上光油, 我貪方便用GUNZE 高身光油, 都係初初薄噴兩三層, 之後就可以厚噴, 我習慣係一之過噴好厚, 咁個SURFACE 會平滑D, 太約都噴左四五層!!

噴好光油之後就係等乾啦...呢架車, 我擺左半年之後先至打磨, 呢段時間, 就係底盤同內籠既組合.  底盤一盤我都只係照指示噴返BODY COLOR, 用筆油返D 雜色,

內籠灰色我係用田宮TS-4 GERMAN GREY, 貪快, 藍色係GUNZE 油性, 但係幾多號就唔記得了... 模型已經有埋MASK玻璃既膠紙, 好方便! 半光黑係用田宮水性X-18, 用噴筆噴. 

到左車殼打磨, 我直接用雙星磨光膏, 用眼鏡布捽, 直至橙皮紋消失為止!! 我試過先用2000號水磨沙紙先磨平橙皮紋, 但係再用磨光膏打磨, 無論如何都唔可以將花痕磨平!! 所以我以後都係直接用磨光膏磨晒D 橙皮紋先!!  但係咁磨法真係磨到手軟! 磨平橙皮紋後用modeller's 2000號磨光膏再打磨. 最後再用田宮既臘水打磨

之後就係窗邊上色, 今次我係用田宮琺瑯油x-18用筆油...效果都唔錯, 之後就係車燈既安裝, 我係用白膠漿痴上.

呢幾張相都係"明天" 幫我影既, 好靚.