我的秋日旅行～Ｄａｙ５

繼續我哋嘅行程，開始進入旅程嘅下半部了．．．

上日睇完新嘢，呢日就係故地重遊！我哋會去原宿，表參道一帶，都係好熟悉嘅地方，零難度，所以行得比較輕鬆與悠閒！主要都係四圍逛逛，天氣實在好到不得了，個天又清又藍，又有陽光，啲樹又齊齊整整，香港好難搵到！！

逛咗一陣，我哋入咗呢度個地標　～　"參商場"！

之前嚟過兩次都冇入去，第一個感覺都幾Ｇｒａｎｄ，有啲似香港嘅置地，專賣貴嘢！可能因為臨近聖誕，商場底層舖咗紅地毯，有棵鑽石砌成嘅聖誕樹，配合一啲好有ｆｅｅｌ嘅音樂，真係浪漫到不能呢！！！！！！！！

行完靚靚商場，跟住去咗嗰條購物通，主要想買買買！不過唔知係因為我哋大個咗，定係舖頭少咗，我哋唔係買咗好多嘢咋！我最勁係買咗９對襪囉！（有兩對係手信嚟架）我而家衣櫃內嘅襪應該可以著幾年！！

沿途我哋去咗一間Ｃａｆｅ食咗個ｔｅａ（份量係相當於ｌｕｎｃｈ），好好味嘅芝士意粉！！（肥死．．．　＞Ｏ＜）今次旅程嘅西餐都唔錯喎！

晚上返到池袋嘅"Tokyohands"，買返啲未買嘅嘢，之後去咗酒店附近嘅"平祿壽司"嘆嘆壽司，好抵啊！食咗個好好味嘅蟹膏壽司，又平，正呀！

某某病都仲要飲啤酒，結果另一某某就要飲多半杯！！迷迷糊糊之下，我跌咗一塊肥美嘅鰻魚落地呢！！