我的秋日旅行~出發!

上星期再次同Joey自由行去到我熟悉嘅日本東京，今次已經係第３次，對上一次係兩年前！

下機後,成功轉了"Skyliner"，差不多４點到達酒店！我哋今次住"Royal"，呢間網上被評為一星嘅所謂酒店，真係見到都唔開胃！（冇法啦，鬼叫原本揀嘅"Theatre"冇位咩)我哋間房聲稱可以住３人，但眼見房內有兩張床及一張爛嘅長梳化，若果真係有第３個人，我估佢冇可能肯瞓嗰度囉．．．我哋喺極度不情願嘅情況下安頓好行李，不停催眠自己：瞓覺啫，瞓覺啫，張床ｏｋ就ｏｋ啦！！！

梳洗過後，開始第一站～"Tokyohands"！！呢間係我哋嘅dreamshop，因為各類精品，文具，飾物，工具，家具．．．總之應有盡有！惟一缺點係８點就關門，太早了！我哋只好快睇，買唔切就只好"再次光臨"！！

行完我哋嘅dreamshop，就梗係搵食，上兩次我哋都去開一間小店食啲定食，今次行到攰攰哋，唔想再諗就去番呢間小店啦！點知今次去到竟然要咩冇咩！牛，冇！豚，冇！！雞，冇！！！成個餐牌我只係識海老（蝦），但Joey唔食得蝦嘛．．．擾攘一輪，廚師都走出嚟叫我哋走！我哋兩個嗰一刻真係好無奈，蕩來蕩去，終於見到另一間小店！起初都有啲阻滯，後來個小二原來識普通話，即刻鬆晒！！我哋點咗個炸雞定食，雞串燒，同埋叫咗兩杯啤酒～要發洩吓！

味道確實唔錯，不過就係因為呢幾塊炸雞，Joey就由第一晚開始起了喉嚨痛．．．