感恩節派對+亡命天涯

上周初，友人話周六某大搞感恩節派對，我可能因為悶，另外亦太相信友人，冇問咁多就應承咗去，應承佢之後，我又有D驚，因為乜都唔知就話跟人去派對，完全唔似我嘅性格，但開咗口就算啦，到時執生吧啦……

到周六，我依時去到某大，先知道原來係某大嘅教會辦嘅活動，見到友人，就問佢認唔認識教會D人呢？點知佢話完全唔識，亦唔知係教會辦嘅活動，佢連個主持人都唔識，咁我同佢講，如果唔想去可以即刻放棄架，我地去第二度食飯啦，點知佢話一場嚟到，不如去睇吓啦……

後來主持人要大家上車，上到車冇人講去邊，大家完全以普通話或英語交談，同行仲有幾個外藉男女同行，我除了友人就一個其他人都唔識，架車行咗約半小時，沿山路上山又上山，跟住大家就落車，地點係一個大型屋苑嘅私人會所，地方唔係大，但人數好多，有成四十幾人左右啦，一入屋成屋迫滿人，屋內亦有幾個外藉男女，我已經想走先，但為咗陪友人，我唯有忍耐一下啦。

教會辦嘅活動離唔開讀聖經、唱聖詩、分享同見証，於是跟住嘅個多小時，實在悶親唔係教徒嘅友人同我，友人亦唔好意思咁，我細細同佢講唔緊要啦，不過要佢請我食飯喎，佢哈哈咁笑咗出嚟，主持人仲以為我地聽得好投入咁, 真好笑！

終於到有嘢食啦，但佢地嘅感恩節食物好簡單，例如：兩盤好生又好似亂草咁嘅菜葉沙拉、兩盤冰冷薯蓉、一盤凍嘅西籣花、一盤凍嘅切段紅蘿白、一盤生嘅切段大蔥同大蒜、一盤凍嘅南瓜蓉、兩盤凍嘅蕃薯、一盤半生熟青紅黃椒、三盤凍嘅火雞絲、咬崩牙咁硬嘅麵包及蛋糕仔、加埋幾款凍飲，還有D佢地自己製作但無乜味又係凍嘅糕點，咁凍嘅陣容，令友人同我大開眼界同嚇親，天氣咁凍，但每樣食物，都好似啱啱晌雪櫃攞出嚟咁DRY同好凍、仲冇其他食材作配搭，冇乜味道，或者外國人鐘意咁食法卦，只係我地香港人唔習慣啦，好彩有幾款醬汁，我地只得將每樣食物都加D醬汁，友人叫我求其食D算，一陣完咗同我再食過嘞！

於是我地唔夠5點半，就同主持人講要走先，點知主持人話冇安排車比參加者走，又嚇咗我地一跳，因為我地只知道架車去咗沙田嘅一個山上，但唔知乜地方，行到出門口，只見一條又長又彎嘅車路，好耐先至有架小巴經過，但連續三架都滿座唔停，完全冇巴士或的士，友人話咁等法唔係辦法，不如沿住條路一直行落去，遇到啱嘅車就搭車走啦，點知越行越遠都冇車站，經過幾個大型私家屋苑，沿途完全冇人行走，天色又開始暗啦，我同友人越嚟越唔知自己行咗去邊？又冇人可以問，就算求救都要話比人聽自己晌邊度架，但唔知可以點算做呢？

正當好驚嘅時候，寶貝媽突然打電話比我，我好相信同佢係心有靈犀架，做阿媽會係阿女最需要佢嘅時候出現幫手嘅，同寶貝媽講咗一陣，我好似冇咁驚嘞，跟住就搵到我地原來身在沙田穗和苑，但面前只有一條斜路，如何走到火車站或巴士站呢？我地唯有趁天黑之前，繼續快D搵到出路，如果天黑就更驚更難行，點知再往下走嘅路更陰深恐怖，沿途好似荒山野嶺，又有山邊燒烤爐，仲要一個人都冇，呢個時候如果有壞蛋出現，友人同我真係唔知點算呀，我地心驚驚、急急腳行到好快，兩個人好似亡命天涯咁，但最後好好彩，比我地搵到火炭火車站，走到車廂裡面，我地先敢抖一口氣，但我雙腳仲晌度震呀震，真係唔知係好驚仰或好攰，友人好激氣，猛話主持人冇安排送參加者走，實在好唔啱嘅做法，冇顧及參加者嘅安危，如果參加者晌回家途中出咗事咁點算？佢話下次呢個教會請都唔到呀！睇嚟佢真係嚇親啦！

好不容易返到屋企，同寶貝媽講起呢日嘅所見所聞，我諗佢都比我嚇親，叫我下次千歧唔好去嘞！

阿媽，阿女知道啦~~~~