細少 Karl ～

2009年4月4日，係 Karl 仔離開住左５年既 SAA，跟我同 Karl 仔老豆、仲有大佬 Jay 一齊住既大日子，話咁快就已經３個幾月喇。

接 Karl 仔返屋企一齊住，係 Karl 仔老豆一直以來既心願，呢個兩年前對 Karl 仔既承諾，兩年後終於實現左，大家都好開心，終於都齊人/狗喇！

講起Karl 仔既身世，佢係人稱”九紋龍”既其中一份子，Karl 仔同一班兄弟姐妹只得個幾月大既時候，係一個垃圾站裹面，被幾個哥哥姐姐救左返去 SAA，一住就住左５年喇。Karl 仔既身形比其他兄弟姐妹高大；因為身形高大，係 SAA 內面一般既狗籠不適合佢，惟有安排佢入住終老房比較大既狗籠，Oh! No! 年幾細細，一歲左右就已經入住終老房，同Ｄ公公婆婆一齊，唔通咁就一世？　不過佢同其他兄弟姐妹都有共同特徵，就係對耳仔都係好大、條尾仔都好長架！

Karl 仔既性格比較內向、慢熱，返到屋企至知，原來佢仲好細膽添架，同佢既身形唔成正比。Karl 仔返到屋企住，對 Karl 仔來講，所有野都係完全陌生，對屋企人、對屋內街外既環境，都要從新適應，就好似一個ＢＢ仔對呢個世界所有野都好好奇，但又好驚、好緊張，不過事實 Karl 仔已經５歲喇，小朋友學習新事物既階段已經過左，要 Karl 仔從新適應新環境，相信都須要一段長時間。

就因為 Karl 仔對呢個世界好多野都好陌生，出到街佢會好驚、好緊張（比起係 SAA 出外行街時又乖又聽話既 Karl 仔，簡直判若兩狗），所以佢返到屋企之後，出現左Ｄ行為問題，例如出街搶繩，對路過既人/狗/貓都好好奇，要衝過去嗅下、八卦下，雖然佢只係想去八卦下，完全無敵意或唔係想去攻擊人，但佢既龐大身形往往會嚇親人。

尤係是係夜晚，夜晚既世界對 Karl 仔來講完全係另一個世界（可能係因為係 SAA 時下晝六點後已經無哂人，要入籠瞓覺，佢咁大個仔都未出過夜街呱？！），夜晚出到街佢會好驚，少少野都已經令到佢好緊張，初時更加試過驚到撲向馬路上行駛中既車，真係比佢嚇死呀！而且以 Karl 仔 23Kg （而家 26Kg 喇！）身形既力量，突然發力向前衝，即使我地用盡力氣，都只能勉強拉得佢住，但我地隻手已經好痛喇（相信 Karl 仔條頸都會好痛....），令我地有Ｄ不知所措！

我地知道咁落去唔係辦法，而且Karl 仔自己本身都好恐懼，佢都一定唔好受，所以我地一定要諗方法幫 Karl 仔克服心理阻礙，但首要條件係我地要冷靜，唔可以發脾氣，要有耐性，如果唔係 Karl 仔只會更加驚，大家都唔會開心。我地試過每晚帶 Karl 仔去企係路邊半個鐘，等佢習慣下街上既事物同聲音；我地又試過用幾款拖帶，試下邊款適合 Karl 仔；我地又上網、買書學下教狗狗既方法.....終於 Karl 仔既心理阻礙克服左好多，無再好似初時咁緊張，而且發現最適合 Karl 仔既拖帶係 Head Collar，佢行得舒服時我地又拖得舒服，Karl 仔真係改變左好多，而家佢乖左好多喇。

至於 Karl 仔同大佬 Jay 既相處，初時我地都有Ｄ擔心佢地相處唔到，因為大佬 Jay 一向都係屋企得佢一個，佢又唔多鍾意其他狗狗，所以接 Karl 仔返屋企住，事前我地都好小心地步署，而且帶埋大佬 Jay 一齊去接 Karl 仔返屋企，等佢地可以一齊返入屋，唔駛分先後。一如我地所料，大佬 Jay 的確唔係咁鍾意 Karl 仔，初時大佬 Jay 望住 Karl 仔既眼神係好有敵意，Karl 仔行埋一Ｄ、嗅下佢、撩佢玩，佢都唔鍾意，會即刻鬧 Karl 仔，大佬 Jay 每次咁樣，我地都會即時制止佢，不過都無可避免地打左一次交，論身形當然係 Karl 仔贏哂啦，大佬 Jay 受傷了。經過三個月既相處，佢地兩兄弟既關係都好微妙，而且大佬 Jay 已經接受左 Karl 仔喇，佢地雖然唔會一齊玩，但佢地有佢地既相處方法，又唔會爭食爭野玩，兩個都好乖仔架。

Karl 仔Ｄ皮膚病，亦係一個我地擔心既問題。未接 Karl 仔返屋企之前，Karl 仔Ｄ皮膚一直都有甩毛既問題，係 SAA 既時候睇左好多次醫生都唔知咩原因引致，諗住接佢返屋企住，希望佢轉下環境Ｄ皮膚會好Ｄ。但返左屋企一個月，Karl 仔Ｄ皮膚只係好左少少，我地決定再帶佢睇醫生。經過８個星期既療程，Karl 仔既皮膚好左好多，生番好多毛，靚仔左好多喇，醫生話佢甩毛既原因應該係食物敏感，可能要長期食貴價腸胃敏感糧。阿仔，你返左屋企果然貴左喎！

而家同 Jay Jay & Karl 仔一齊生活，雖然係要付出好多時間、心機同金錢，但佢地經常都會有Ｄ足以令我地笑一日既攪笑野發生，有時無意中發現佢地各自既小習慣，會係對方身上出現，原來佢地已經互相影嚮，學習左對方既小習慣，真係好有趣。例如以前粗粗魯魯既 Karl 仔，會學左大佬 Jay 而變得斯文左；而一向唔咬硬骨頭既大佬 Jay，又會學左 Karl 仔一齊咬骨頭......佢地真係好攪笑架！

有左佢地......生活好滿足！！！