洋葱蘑菇雞包 (老麵)

今回又係用簡易家庭麵包的食譜做這個包, 即係用直接法做就得喇, 我見雪櫃裡還有幾舊老麵未用完, 咁就用埋佢, 在原先的食譜內, 加入麵糰總重量不超過30%的老麵, 便可令到個包包更軟和有彈性!

我好鍾意將餡料放係個包面上, 睇上去會靚啲, 好似好好味咁! 整型既時候, 麵糰中間部份, 要按一個糟, 用來藏住餡料的, 免得麵糰澎脹時將餡料掉落。

先處理雞肉, 用鹽, 生抽, 糖, 胡椒粉, 酒, 麻油和生粉醃半小時, 記得一定要落生粉, 如果唔係, 啲雞肉就會好 "鞋" 唔夠滑, 為確保雞肉熟透, 我將洋葱用少許牛油爆香, 落鮮蘑菇片和雞肉, 加少少黑椒, 炒一會至半熟攤凍, 等麵糰最後發酵好, 塗蛋水後, 將餡料放上面, 用陰力輕輕按下, 唔可粗暴對待, 同埋唔可以貪心放太多料係個麵糰上面既(雖然好食), 如果唔係麵糰洩氣咗就閉喇! 入爐, 用200度C 焗13分鐘,

麵包出爐的一刻, 真係好香! 未食得住, 仲要幫佢扮吓靚靚, 唧啲蛋黃醬, 同埋洒少少青粉係上面, 靚晒喇! 我手震震, 啲蛋黃醬唧得麻麻哋, 算啦! DIY 係咁上下架喇!