離奇新聞

先排睇報紙, 發現有好幾單新聞都幾離奇下．

其實之前睇完後都想寫吓, 但係始終提唔起勁, 可能懶啦 ~

而家想同大家分享一下, 哩幾單新聞都報導在同一份報紙 (東方) :

第 1單係頭條 : 你地一定記得 ! 就係有個廿幾歲0既後生仔揸車撞左落收費亭度．當時係凌晨時份, 報導話架車撞到車頭變 Ｖ字形 , 最離奇0既係消防員救人時發現條安全帶唔係綁住個後生仔, 係唔知點解綁實左司機個車門, 消防員想救都搞左一輪先救到個後生仔出來, 不過已經掩掩一息．跟住有段小訪問--個死者親友話當晚都覺得死者有唔妥, 成日兜錯路又心不在焉, 好似撞邪咁... 

我覺得奇就奇在點解條安全帶會綁住個車門呢 ? 莫非一定要佢死 ?

第 2單 : 話發現一老婦躺在在枝角天橋, 頭部受傷被屑去一塊頭皮, 滿面鮮血場面恐怖, 好在被發現得早, 沒身命危險．據報導, 話女傷者同幾名朋友竹戰至凌晨臨天光時走的, 她的朋友看著她上了小巴的．經警方調查, 老婦同人無仇無怨, 又無債務糾紛, 要等佢好返先可以再問話．

咁點解會瞓0係行車天橋 ? 係天橋喎, 唔係行人天橋喎 ~ )) 咁奇 ? 

第 3單 : 都應該聽過, 就係有個男人同親朋好友出海, 因為見到個水泡跌左落海, 於是就跳入海中想執返上遊艇, 點知突然嗌"救命", 然後失去影蹤．事後出動蛙人, 水警都搵唔到, 甚至乎佢0既親人"拋西瓜"都搵唔到...過左兩日我睇報紙, 都係搵唔到, 佢地就話懷疑佢因為抽筋...

我其實一聽到哩單新聞, 第一個感覺係...跳入海突然嗌救命, 好怪囉 ~ 好似有其他"野"且走左佢咁, 如果話有鯊魚且走左佢, 可能貼切 d 囉 ~

你地又點睇呢 ?