連環三日血拼

二弟早幾日話琴晚同小草番大陸食飯，我又做電燈膽話要跟佢地拍拖，估唔到二弟好爽快咁話 mo man tai。今次我主要係想買個靚靚又輕便嘅袋方便旅行，其次係想再發掘一下有冇靚冷衫。

本來琴晚只得我一個做電燈膽，因為貝特一向唔鍾意番大陸行街，佢好怕講價，壓到價又覺得個原價係開天殺價，壓唔到又代表一定買貴左野。不過佢知我一向論盡，唔放心我去到冇人照顧我，(二弟同小草始終係後輩，冇理由倒番轉要佢地睇住我)，所以犧牲做 gym 時間陪我一齊去。老公，你對我真係好架喇！

於是我地一行四人有講有笑咁首先去左味千醫肚先。叫左兩碗拉面、兩碗烏冬、炸雞軟骨(呢個係食日本料理必點嘅「賣飛佛」)，炸日式豆腐、煎餃子、炸蝦卷。味道一般啦，不過價錢 ok，四個人埋單唔駛 $160。最好食係個咖哩牛肉烏冬，咖哩幾香烏冬幾滑，不過啲湯就偏鹹。最難食係雞軟骨，我幾鍾意食都唔會喺果度再叫。

之後就開始進攻行街喇。我今次收穫仲豐富過前兩日呀，買左件灰色 knit dress、兩件用黎襯衫嘅樽領衫、一個好靚嘅仿鱷魚皮配毛毛紫色袋、同埋買左個 usb joystick 俾貝特打機。另外我仲同小草一人買左一對黑底閃銀點絲襪同埋一條紥頭髮橡筋，小草自己就買左件有帽 knit dress。買左咁多野全程都係用左 $3XX 咋，抵。最喜出望外係買到個袋，係臨走前小草發現架。果款我地上次街見到我都覺得幾靚，不過當時冇特別用途所以冇諗住買。琴晚一直都搵唔番果款袋，正在失望之際竟然俾我地搵到，最開心係唔知個姐姐仔係咪趕收工，竟然唔駛我還價一開就開 $65 俾我，比上次死都唔肯低過 $140 果個袋平一大截！後來我都仲要壓到佢 $60 先成交，呵呵呵！最唔抵係對絲襪，買果陣就話 free size 實啱著，番到屋企一試，個褲浪「卡」住，激死人喇，等我仲同佢講價講到牙血都出埋，先平果 $2 一對。 小草高我幾吋我諗佢仲谷氣。

最後小草都不忘買 snack 俾我地屋企隻愛犬波仔。波仔好好笑架，平日細膽又自閉又懶，對住我地又成日擺個乖巧嗲樣出黎狂擺尾，不過一有八卦野或者陌生人黎佢就會轉左性，呱呱嘈不停凶(吠)人成隻警犬咁，所以我地買左件印有「警犬」字眼嘅狗衫俾佢，超搞笑！不過放心，我地唔會俾佢咬人，我地會捉實佢，用零食引開佢注意，不過可惜佢始終狗性不改抦到佢七彩都要吠，又唔知自己細細隻俾人一踢就暈低，仲懶英雄咁，真係俾佢激死。

買完哂我地同波仔之後，兩位男士都冇買自己野，二弟仲為左幫媽咪老豆買電筒格左三間價添。佢地真係勞苦功高，又要陪行悶到抽筋冇野睇，仲要幫我地拎野俾錢。我真係覺得自己好幸福，有老公同細佬對自己好！好多謝你地呀！！

琴晚真係幾開心，四個人有講有笑。唔知係咪人大左，而家越黎越鍾意同屋企人一齊。即使細個成日鬧交都好，一家人始終係血濃於水唔會有隔夜仇，有咩事一定會為屋企人著想。