網誌分類：Bert & Berchta |
自從上次過大海去完軒軒個畢業禮之後，聖誕同新年期間有好多節目接踵而來不能盡錄，例如去左貝特家族喺大陸間屋度玩、去左細佬屋企打邊爐做冬、同 friend 及屋企人分別狂食左好多餐、大除夕又幫貝芝達爹地賀壽，跟住去左漁人碼頭趁熱鬧……都過得幾開心，不過人懶，過左去就由過得佢過去，唔再喺呢度追溯喇。
但係一定要提嘅就係大除夕果晚我俾提款機食左張卡，好慘呀，度過左一個冇蚊年嘅跨年呀，嗚。而家周身冇蚊，要靠貝特慷慨解囊施捨我幾個錢咋，所以我呢幾日都唔敢得罪佢呢個米飯班主。
今朝超眼訓架車又攞左去執靚仔，搭正 8 點正就出門口坐村巴「出城」番工，烏下烏下木無表情之下撞到個同事，勁樣衰。好彩貝特有個好提議，一齊食埋麥當當早餐先番工，當堂成個人醒哂，先叫做有 d 「番黎」嘅感覺。頭先個同事請全世界食 tea 時，我都同佢講仲未訓醒，免得佢以為我做乜咁寸。
今日放工後仲要番學，之後同貝特、貝芝達媽咪、細佬同佢女友小草食 pizza。唉，希望快d考埋個試夜晚空閒 d 可以俾我煮下飯仔。番工嘅日子真係好沉悶，幾時先會有 財務自由？真係要中番個六合彩金多寶至得呀
～到時我會捐一筆錢，俾部份屋企人，跟住一炮過供哂層樓，另外買層樓揸手試下做包租婆有幾過癮嘅滋味。淨番嘅錢用黎投資，部份就用黎買哂 5 號仔，淨食息夠我地一個月家用咁我就已經好滿足架喇，到時搵份冇壓力嘅工過下日辰，有時間有閒心就做義工幫人咁就好啦，40 歲前實現到就好喇。
